Shillong, Nailur 11 : U Vice Chancellor ka North Eastern Hill University (NEHU) Prof Prabha Shankar Shukla ha ka sngi Nyngkong, ula ong ba ka University kam don jingthmu satia ban pynkylla ia ka rai ban pyntreikam ia ka National Education Policy (NEP)-2020 ha Jylla.
“Hynrei, ha ka jingpyrshang ban pynthikna ia ka jingpyntreikam kaba biang tam kat kaba lah ia ka Policy, ka University kan sa iakren bniah bha ia kino kino ki jingduna ne ki ishu kiba lah ban mih ha ka por ba pyntreikam ia ka Policy, ka ban long ha ka jingialang jong ka Academic Council ban sa wan” ong u Prof Shukla hadien ka jingialang bad ka kynhun jong ka Meghalaya College Teachers’ Association (MCTA).
U Vice Chancellor ula kyrpad biang ia ka MCTA ba kan ai ka jingiatreilang bad ka University khnang ban lah pyntreikam sani bha ia ka NEP 2020. Kat kum ka jingong jong u, ka thong ba hakhmat eh ka long ban pynkhlain ia ka rukom ai jinghikai bad ruh ia ka bha ka miat jong ki samla pule.
Ka MCTA kala ieng ban dawa weng noh ia ka jingpynbna (Notification) ba pynmih ha ka 12 tarik Naitung, kaba bthah ia baroh ki College bala pyniasoh bad ka NEHU ba kin pyntreikam ia ka NEP bad phaidien biang sha ka Degree Course kaba rim.
Kat kum ka jingong ka Association, ka dei ka kam thok ba pyllein pyllein haba ka jingpynbna kala kam ba ia ka NEP yn pyntreikam kat kum ka rai bala shim ha ka jingialang ba 110 jong ka Academic Council.
Hynrei u VC ula ong ba ka jingialang ba 104 jong ka Academic Council ka University ha ka 11 tarik Nailur, 2020, kala shim rai “Ban pyntreikam ia ka NEP 2020, haba rai ruh ban thaw ia ka Task Force ban lah pyntreikam bha ia ka Policy”.
Ula ong ba ka Academic Council kam ju thaw ia kino kino ki Policy haba buh hakhmat ia ka tarik ba dei sdang. Kano kano ka policy bala thaw da ka Academic Council la khmih lynti ban pyntreikam da ka Executive Council khlem ka jingpynslem namar ia ka policy la thaw bad pyntreikam na ka bynta ka jingbha jong ki kynhun bapher bapher. Naba ka Academic Council kala rai pyntreikam ia ka Ordinance, Regulation bad Syllabi, ka Executive Council kan hap ban pyntreikam khlem kano kano ka jingpynslem.
U VC ula ong ba haduh mynta, ka University kam pat shym la ioh ia kano kano ka shithi na ki Principal jong ki College bala iasoh, ba pynpaw ia ki jingeh ha ka ban pyntreikam ia ka NEP 2020 haba iadei bad ka Four Year Undergraduate programme (FYUP).
Ha ka jingshisha, ka jingialang bala khot pynlong da ka University bad ki Principal jong ki College bala iasoh, ha ka 21 tarik Naitung, ka dei kaba la iashimbynta da jan baroh ki Principal bad kila pynpaw ia ka jingsngewhun ia kane ka sienjam. Ia ki minutes (jingiakren) jong ka jingiakren, kaba don lut ia baroh ki ishu bala iakren bad ki jingpynshai kiba mih, la dep ban sam lut sha baroh ki Principal.
“Ngi sngewthuh ba ka jingpyntreikam ia ka system ba thymmai ka donkam ban hap iapynbeit hangne hangtai ha kaban lah weng ia ki jingeh kiba mih. Lada don kino kino ki jingbym biang ha ka rai jong ka jingialang ba 110 ka Academic Council ha ka por ba pyntreikam ia ka policy, ia kane yn sa pynbeit ha ka por ba pynthikna ia ki minutes (mat iakren) jong ka jingialang ban wan jong ka Academic Council (111) kat kum ka policy” ong u Prof Shukla haba bynrap “Ka University kala dep kren shai ba ia baroh ki jingiarap kiba donkam ha ka por ba pyntreikam ia ka Policy, yn sa ai sha ki College ba pyniasoh lait noh tang ka song pisa ”.
U Prof Shukla ula ong ba ki kam kiba iaid kumba la kdew hangne kala pynshai lut b aka rai ban pyntreikam ia ka NEP 2020 ia ki FYUP ka dei kaba la shim hadien ka jingiasyllok kaba iar bha, ka jingiakrren bad jingmynjur jong ki bor ba dei khmih jong ka University bad bynrap “Namar kata, ka jingkam ba rai leh donbor da u Vice Chancellor ka dei ka bym ieng nongrim satia”.
Nalor kane, u VC ula pyntip ba ka University kala shimkhia ia ki jingduna haba phai sha ki jingtei bad ki jingdonkam ha kiba bun ki college bala iasoh bad ka NEHU.
“haba iaroh ia ki jingsngewkhia jong ka MCTA, ngi la thaw bad pynwandur ia ka curriculum kiba lah ban pyntreikam naduh u snem 2023-2024 khlem da pynbun ia ka jingshim klas bad ki jingtei na ka bynta une u snem” ula ong.
Ula ong ruh ba ka jingkam jong ka MCTA ba kan don ka jingtynrong kaba khia ha ka pisa tyngka ia ki samla pule ruh ka dei ka bym don symboh.
Pule lang ia kane: NEP 2020: Rai ka MCTA ban bteng ia ka ‘boycott’ ba khlem seisoh ka jingiakren bad u VC ka NEHU
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
.){kind=link}