Shillong, Nailur 19 : Ka Sorkar Jylla kala pynduh pyndam noh ia ka jingpynbna (Notification) jong ka Khasi Hills Autonomous District Council (KHADC) ba buh kyndon ban pyrrkhing ia ka jingpynlong ia ki kam iakop khwai dohkha hapoh u pud u sam jong ka Council.
Kane ka jingpynbna kala mih na u Secretary ka Tnad District Council Affairs ka Sorkar Jylla Bah F.M Dopth hynne ka 19 tarik Nailur kat kum ka hukum jong u Lat ka Jylla.
Kane kala mih ruh tang hadien khyndiat sngi ba jia ka jingjia ba sngewsih ha Pamphyrnai, Ksehkohlong, West Khasi Hills, ha kaba kawei ka Longkmie kala duh noh iala u Khunlung Shynrang ba ka Kha tang namar ka jingshah khang lynti ka kali ha ki hajar ngut ki rawon bad ki paidbah kiba wan sha ka jingiakop khwai dohkha, ban leit kha khun sha Hospital ha Shillong.
Kane ka Longkmie kala kha ia u Khun hapoh ka kali hynrei tang khyndiat por, une u Khunlung ula khlad noh bad ia ka Kmie la hap ban pynkit noh mar mar sha Holy Cross Hospital, Mairang ban iada ia ka jingim jong ka.
Kat kum ka jingpynbna No DCA.33/2012/520 la ong “ Kala poi sha ka jingtip jong u Lat ka Jylla ba ka jingpynbna (Notification) No DC/RBF/XXXII/64/2023/171 ba 14 tarik Naitung 2023 jong ka Khasi Hills Autonomous District Council ba iadei bad ka jingkhmih bad jingteh kyndon ia ki jingiakop khwai dohkha, la pynmih ha ka Part-II jong ka Gazett ka Meghalaya ha ka 3 tarik Nailar 2023; bad…. hynrei, ym shym la iaid kat kum ka lynti kaba dei ha kaban pynmih ia kane ka jingpynbna”.
“Mynta, namar kata, u Lat ka Jylla u sngewbha ban pynbna ba ka jingpynmih ia kane ka jingpynbna No DC/RBF/XXXII/64/2023/171 ba 14 tarik Naitung 2023 jong ka Khasi Hills Autonomous District Council ha ka Gazett ka Meghalaya ba 3 tarik Nailar 2023 la pyndam noh” kala ong.
 jong ka Khasi Hills Autonomous District Council (KHADC) ba buh kyndon ban pyrrkhing ia ka jingpynlong ia ki kam iakop khwai dohkha hapoh u pud u sam jong ka Council.){kind=link}