Shillong Lber 31: U samla Federick Kupar Kurbah ula ioh iaka lad kaba shisien haka jingim ban leit pyni iala ka sap ialehkai Football sha ri Bilat bad ka kynhun ialehkai football ba pawnam ka Manchester United.
Katei ka jingioh leit ialehkai sha England jong u samla Federick ka dei hadien ba ula leit ban iashimbynta ha ka ‘United We Play’, kaba la pynlong da ka Apollo Tyres bad ka Manchester United ha kaba palat 5000 ngut kila iashimbynta, hynrei napdeng kitei, 4 ngut ki samla naka ri India kila shah jied ban leit pyni iala ka sap hapoh madan Old Trafford, England.
Ki 4 ngut kiba la shah jied ki kynthup ia u Federick na Meghalaya, u RS Preyarhanjan na Chennai, u Ronald Singh na Chandigarh bad u Kunal Yeole na Pune bad kine ki rang ialehkai kila ioh ban peit iaka jingialehkai Football ha Old Trafford, ban ioh iashimbynta lang haka jingioh jinghikai na ki Coach jongka Manchester United Soccer School bad kila ioh ruh ban ia phylliew jingmut bad ki khlur ialehkai football jong katei ka club.
Ka United We Play kadei ka prokram kaba la pynlong ha kylleng ki bynta jong kane ka ri da ka Apollo Tyres ryngkat ka jingkyrshan jongka Manchester United kum shi bynta ban pynshlur ia ki khynnah kiba tbit ha ka jingialehkai football bad ban ailad ruh iaki ba kin pyni iala ka sap ha katei ka rynsan da ka jingthmu ba kin ioh jinghikai shuh shuh bad mynta ka wat kaba lai jong kane ka prokram ka dang iaid shakhmat.
U Federick uba la don 17 snem ka rta, udei uba wan naka longing kaba duk bad ula sdang ban ialehkai football naduh ka rta kaba u dang rit bad la ki paralok kiba sah marjan.
Ka meirad bad u Kñi jongu kidei kiba ieid bha iaka jingialehkai football bad kila dap da ka jingkmen ban iohi ia ka jingtbit ialehkai jong u Fredrick ha ka rta kaba dang rit.
U Federick, ula ong ba u itynnad bha ia ka rukom ialehkai jong u Neymar bad ula sdang ban ioh jinghikai na u Coach hapoh skul ha ka por ba u dang shong haka klas IX bad hadien 3 snem jong ka jingiai minot bad jingpynleit jingmut ban ialehkai football bad haka pule puthi.
Ka khlam jingpang kala wan saphriang bad kala pynslem ia u ban leit pyni iala ka sap sha ri Bilat, hynrei une u samla um shim la duh mynsiem noh bad ula iai bteng ban kilan met bad pyntbit ialade khamtam da kaba peit ia ki Video na ka Social Media bad khamtam ia ka rukom ialehkai jong u Neymar.
Une u samla ula shah jied haka trial kaba la long ha Polo Ground, Shillong bad nangne ula ioh ban leit iashimbynta haka wat kaba khatduh kaba la long ha Chennai, ha kaba ula lah ban pyni iala ka sap ka phong bad pynshohsiej ia baroh kynthup ia ki khlur ialehkai jong ka Manchester United.
Hadien ba ula wanphai na England, u Federick ula ong, “Nga sngewkmen bad dap da ka jingsngewtynnad ba ngan ioh ban leit sha Manchester United. Ym tang ba nga ioh ban iakynduh ia ki khlur ialehkai hynrei nga la ioh ban iakren bad iaphylliew jingmut bad ki kynthup bad ki rangialehkai jong ka Under-18. Kaba kham sngewtynnad kadei halor ka jingioh jinghikai ka jong nga hapoh Carrington Training Ground ka long kaei kaei kaba ngan iai sah kynmaw halor ka jingleit ka jong nga”.
Pule lang ia kane: Mih ki Kynthei ban pynkhuid ia ka surok ha Ri-Bhoi namar ka jingialang G20
