Shillong, Naitung 22: Palat 1,900 ngut ki samla pule na ki 9 tylli ki jaka pule kata na Ri Bhoi, North Garo Hills, West Garo Hills, West Khasi Hills bad Eastern West Khasi Hills District kila pyndep iaka Soft Skills and Talent Identification Programme lyngba ka Aspire Meghalaya ba la pynlong ha ki skul bapher bapher hynne ka sngi.
Kila don palat 5000 ngut ki samla na kylleng ka jylla kiba la iashimbynta haka Soft Skills Training ba la pynlong ha ki 25 tylli ki jaka pule naduh ba sdang ia katei ka prokram ha u Lber bad kila don palat 65,000 ngut kiba la dep ban iashimbynta haka wat kaba nyngkong kaba long mynta u snem, kaba la pynlong ruh iaka jylla kaba la lah ban pynlong ia ka prokram kaba heh tam ia ki samla hapoh jong ka Meghalaya Youth Survey, 2022.
Ka Aspire Meghalaya kadei ka prokram jongka Dept. of Sports & Youth Affairs, ka sorkar Meghalaya, kaba ialeh ban pynkhlain ia ki khynnah bad ia ki samla ban ioh ia ki jingpyntbit, ban pynkhreh iala ka jingim bad ban ithuh iala ka sap ka phong. Ia kane ka prokram la kyrshan da ka State Education Mission Authority of Meghalaya (SEMAM) lyngba ka tnad ka pule puthi jong ka jylla bad la pyntreikam da ka AVENUES, Meghalaya.
Ha ka jingialang kaba la long ha Umden, u Shivansh Awasthi (IAS), Under Secretary, Dept. of Sports and Youth Affairs, u la ong, ka jingai jinghikai kaba kyrpang lyngba katei ka prokram kadei ba ka ai mynsiem ban pyrkhat kum ka imlang sahlang bad pynshlur ruh ban pyrkhat iaka sap ka phong kaba don kum u riewshimet.
“Ka kamram jong ngi kadei ban ithuh iaka sap ka phong da ka jingpynlong ia ki prokram kum ka Aspirebad ban kyrshan ia ki ba kin iaid shaphrang naka bynta ban tei iaka lawei kaba phyrnai” ong u Awasthi.
U Staline Ch Marak, uba pule Klas XII ha Tura Government College, u la ong, kawei naka jinghikai kaba kongsan tam kaba u la ioh lyngba ka Aspire kadei ban long uba skhem jingmut halide bad watla ym lah ban kren bha mynta hynrei kaei ka jinghikai kaba u la iohpdiang kala pynlong ia u ban ieng hakhmat jong phi ban pynduh dyndon iaka jingsheptieng”.
Haba kren ha kawei pat ka jingialang ha Tura, u Vibhor Aggarwal (IAS), SDO, Dadenggiri Civil Sub-Division, West Garo Hills District, u la ai mynsiem ia ki samla ba kin pyndonkam hok iaka jinghikai kaba kila ioh.
“Ym don mano mano ruh kiban long kiba seisoh ha ka jingim ka jongki lada kim kren, khlem da pynpaw iaka jingangnud bad iaka jingkhmih lynti iaka lawei ka jongki bad ia kaei kaba ki don ban synniang sha ka pyrthei” ong u Aggarwal.
U la kyntu ia ki Principal bad ia ki nonghikai ba kin pynlong ia kum katei ka prokram bad jingiakob man la ka por, ha kaba ki khynnah kin ioh ban pynkhrehbha ialade la ka long ha kaban kren ne ban pyni iala ka sap ka phong.
Ki 9 tylli ki jaka pule ki kynthup ia ka St. Joseph’s Higher Secondary School, Umden bad Ri-Bhoi College, Nongpoh in Ri Bhoi, St. Thomas Higher Secondary School, Salpara bad Mendipathar College ha North Garo Hills, ka St. Dominic Savio Secondary School, Garobadha bad Tura Government College ha West Garo Hills, ka Mairang Presbyterian Science College bad Khadsawphra College ha Mairang, Eastern West Khasi Hills bad ka Sibsing Memorial Government Higher Secondary School, Nongstoin, West Khasi Hills.
