Shillong, Naitung 22: Ka United Democratic Party (UDP) hynne ka sngi thohdieng, ka la pynpaw ia ka jingsngew skhem ba kan ioh thaw bad ialam hi ia ka Sorkar Jylla hadien ka elekshon MLA 2023.
“Haba peit ia ki dak ki shin na ka jinglong jingman ka sain pyrthei mynta ha Jylla, ka UDP ha kane ka kynti kan lehbha bha ha ka elekshon 2023” ong u Dr Jemino Mawthoh General Secretary ka UDP.
Une u Nongialam ka UDP ula ong ba watla ka UDP ka dei kaba donlang bad ka Sorkar, hynrei ki paidbah kila phai sha ka UDP kum ka seng ka ban thaw ia ka Sorkar ha u 2023 haba kam ruh ba bun ki Nongialam na ki Party bapher bapher kila ai ktien ba kin mih aireng na ka ticket jong ka UDP ha u snem 2023.
“Ngi don ruh kumba 6-7 ngut ki MLA kynthup ki MLA na Ri-lum Garo kiba la aiktien ban iakhun noh na ka UDP ha ka elekshon ban wan” ula ong haba pyntip ba ka UDP ia mynta ka don 8 ngut ki MLA bad 2 ngut ki Associate Member ha ka Iing ba 60 ngut ki Dkhot.
Haba pynpaw baka UDP kala nang khlain katba nang iaid ki sngi, une u Nongialam ka UDP ula ong “Lada ngi khein ia baroh ki MLA, ki bym dei ki MLA bad ki MDC ba mynta (kiban mih aireng bad ba don jingkyrmen ban jop na ki Constituency bapher bapher), ngin sa leh bha bha ha u 2023”.
“Mynta da ka jingpra phom jong ka Congress bad ka jingwan ka party thymmai (AITC) ha ka Jylla bad da ka jingkynrum kynram ha kiwei ki Party, ngi iohi ba ka UDP kala nang khlain nang khlain bad na baroh ki dak ki shin, la paw ba ka UDP kan sa ialam hi dalade ia ka Sorkar ha u snem 2023” ula ong.
U Dr Jemino ula ong ba hadien u snem 2018, ka party ka lah ban jop haduh 3 tylli ki elekshon shiteng samoi kaba dei ka dak ba bha ia ka UDP.
Haba kylli ia ka jingshah khein B Team, u Dr Jemino ula ong ba ka UDP ha kane ka kynta kam kwah shuh ban nang shah khein kum ka B-Team jong ka Congress ne ka B-Team jong ka NPP.
“Ngi kwah ban long ka Team A ka ban ialam ia ka Jylla ha u 2023. Kane ka dei kaba ngi kwah bad ngi la trei shitom ban ioh ia ka jingkyrshan ki paidbah bad ngi kyrmen ba ki kam ki jam kin sa wandur ha ka lynti kaba dei khnang ba ngin lah ban ai ia u nongialam uba donkam ha ka Jylla ha kine ki san snem ban wan” ula ong.
Ha kajuh ka por, une u Nongialam ka UDP ula pyntip ba ka Manifesto Committee jong ka Party ka dang pynkhreh shaid shaid ia ka manifesto bad shen kan sa wanrah noh sha ka rynsan u paidbah khnang ba ki paidbah kin tip ia kaei kaba ka party ka kwah ban leh hadien u 2023.
