Shillong, Naitung 16 : Haduh 146 ngut ki Pulit constable jong ka 2nd Battalion, ka Meghalaya Police, kila pyndep ia ki jinghikai pyntbit hynne ka sngi Nyngkong.
Ka Director General of Police (DGP) Idashisha Nongrang kala khmih bniah iaka Passing Out Parade kaba la long ha Goeragre, West Garo Hills District.
Haba kren haka jingialang ka Kong Nongrang kala ong ba ka lynti kan long kaba eh bha bad kala kyntu ia kine kiba rung thymmai ha ka kam pulit ba kin pyndonkam iaka jingioh jinghikai bad ia ki kaba la ai ha ki.
Kala iaroh ruh ia ka kamram kaba la leh da ki Instructor bad kala ong ba ki don ka bynta kaba khraw ha kaban saidur ia kine ki samla kiba dang shu rung kam thymmai.
“Ha ka pyrthei kaba mynta ka jingdopia ka sap ka phong ka long kaba kongsan bha bad ka Meghalaya Police ka ai ia katei ka jinghikai ia ki shynrnag badk I kynthei kiba don ha ki uniphom” ong ka DGP
Ka DGP kala pynkynmaw ruh ia u synniang uba la noh da ki dkhot kiba mynshwa bad kala ai burom ia kito kiba la khlad noh ha ka jingshakri ha ka kam ka jongki.
Katba u Commandant JFK Marak ula ong ba ka Batch ba nyngkong jong ki Constable kiba la pyndep ia kajingioh jinghikai kadei ha ka 5 tarik u Nohprah 1983 bad mynta la don palat 36 tylli ki Batch jong kiba dang shu dep rungkam thymmai bad haduh mynta ki don 3112 ngut ki pulit Constable.
Ha ka 3 tarik u Naiwieng2008, kane ka Battalion kala shah pynman kum ka Armed Police Training Center ban pynbiang ia ka jingdonkam ha kaban ai jinghikai ia ka Meghalaya Police.
U Marak ula ong ba kitei ki 146 Constable kiba dang shu rungkam thymmai kila leh ia ka Basic Training naduh ka 1 tarik u Nailar 2023.
Kine ki Constable kiba la pyndep ia ka jingioh jinghikai ki kynthup na ka 1st, 3rd, & 5th Battalion Meghalaya Police, SF-10, East Khasi Hills DEF, West Jaintia Hills DEF, East Jaintia Hills DEF, Eastern West Khasi Hills DEF, West Garo Hills DEF, East Garo Hills DEF bad South Garo Hills DEF.
“Ha kajingai jinghikai ha kine ki 11 bnai, kila leh ia ki training ki bapher bapher ban pyndonkam ia ki tiar siat, jingshna, ka buit iakhun, jingsiat suloi bad kiwei kiwei ki bynta. Ka kynhun jong ki nonghikai ki jong ngi ka la pyrshang ban pynrung ha kitei ia ka jingtbit bad iaka sap ka phong kaban iarap ia ki pulit ba kin long kiba don akor, don burom, kiba kohnguh, kiba shongkhia bad ka jingdon ia ka jingsngew sarong” ula ong.
“Ngi lah ai jinghikai ha kaba iadei bad ki aiñ ki kanun, halor ki kam kiba iadei bad ki kynthei bad shynrang, ka hok longbriew bad burom ia baroh ki jaidbynriew bad ki niam bad kiwei kiwei ki bynta kiba kongsan na ka bynta ka kam pulit ha kane ka juk kaba mynta katkum ka jingdawa ka por. Ngi la pynrung ruh ia ka jingai jinghikai kiba thymmai na kabynta ban pynlong ia ki jingialehkai, ka jingiatai ha ki kynhun bad kiwei kiwei ban sngewthuh kham bha ia ka rukom ai jinghikai. Haba kine ki samla kin sdang ia ka kam ka jongki, ngi la pynkup bor iaki da kaba ai jinghikai ha kaba iadei bad ka rukom pynlut pynsep, ka koit ka khiah, ban phaikhmat ha ki kam iing kam sem bad kiwei kiwei kiba kongsan” ula ong.
Ula pyntip ba baroh kiba ioh jinghikai kibaieng hakhmat jong ngi baroh kila pyndep ia ka Mid Term bad Final Examination ha ka Indoor bad Outdoor subject bad la pynbna ba kila pyndep ia ka Basic Training Course kaba la pynlong hange ha ka Armed Branch Training Centre of 2nd Battalion, Meghalaya Police, Goeragre mynta ka 15 tarik u Naitung 2024.
“Ngi ngeit skhem ba kine ki samla kila long kiba kloi mynta ban iasoh ha ki kyrdan bapher jongka Meghalaya Police bad ban pynlong ia ka iing ka sem, ka jylla bad ia ka ri kaba sngewsarong halor ka jingtrei met bad mynsiem bad da ka jingshlur” la bynrap u Commandant.
