Shillong, Jymmang 13 : U Commissioner & Secretary ka Tnad Education Vijay Kumar Mantri ha ka sngi Ba-ar, ula pyntip ba ka Sorkar Jylla kala shimkhia bha ban tuklar mardor halor ka eksam Common University Entrance Test (UG) 2025 bad da ka jingiatreilang bad ka National Testing Agency (NTA), la lah ban ithuh shuh shuh mynta ia ki centre thoh eksam ha Jylla.
Baroh ki samla kiba shah ktah, kiba shah pynngat thoh eksam sha ki centre shabar ka Jylla, kin sa shah pynngat noh ha ki centre kiba don hapoh ka Jylla, ong u Mantru.
Haba pynpaw ba ka Sorkar Jylla kam don bynta eiei ruh em halor ka jingpynngat centre ia ki samla pule, u Commissioner & Secretary ula ong ba ka long kongsan ban tip ba ka jingpynngat ia ki centre thoh eksam ka dei kaba la leh beit tang da ka NTA kaba pyndonkam ia ka Automated Software System.
Kat kum kane ka Automates Software System, la pynngat centre kat kum ka jingjied hi jong ki samla ba iakhun ia ka eksam. Ki samla ki hap ban jied ia saw tylli ki jaka thoh eksam bad kane ka system ka jied pat ia ki centre napdeng kine ki saw tylli ba jied hi ki samla. Kumta, lada ki samla ki ioh shabar ka Jylla Meghalaya, ka dei hi namar ba kila jied ia ka jaka kum kawei na ki jaka ba ki kwah. Kane ka kynthup ia ka case kaba u samla pule ula jied ban thoh ia ka eksam shaduh sha Port Blair.
Haduh 12,685 ngut ki samla pule na Meghalaya kila register ban iakhun ia ka eksam CUET(UG), 2025. Napdeng kine, 7742 ngut ki samla kila shah pynngat ha ki centre kiba don ha Meghalaya namar ka jingduna ki centre. Haduh 4943 ngut kila shah pynngat ha ki centre kiba don shabar ka Jylla bad na kine, 4654 ngut kila ngat ha ki centre kiba don ha Assam. Rang 289 ngut kila ngat ha ki centre ba shabar ka Meghalaya bad Assam.
U Mantri u pyntip ruh ba tang 93 ngut ki samla kila shah pynngat ha ki centre kiba don shabar jong ka thain Shatei Lam Mihngi bad uwei u samla pule ula ngat sha Port Blair bad kane ka dei namar ka jingjied hi jong u ia ka jaka kaba ar.
U Mantri u pyntip ba ki don tang 2 tylli ki sor ban jied ha Meghalaya bad 5 tylli ki sor ban jied ha Assam. Namar ka System ka buh ban jied beit thik tang na ki saw tylli ki jaka bala jied hi da ki samla pule, ki samla pule kila dei ban jied beit thik tang kawei napdeng kine ki 5 tylli ki jaka sor ban lait na ka jinghap leit shabar ka thain.
Halor ka jingslem ban pyntip ia ka jingduna ki centre, u Mantri ula ong ba haba iadei bad ka eksam CUET (UG)2025, ka NTA kam shym la phah ktien ne pyntip lypa sha ka Sorkar Jylla halor ka jingduna ki centre thoh eksam hapoh ka Jylla. Kane ka kam kala mih haka khyllipmat ba khatduh haba ki samla pule kila shah pynngat leit thoh eksam shabar ka Jylla Meghalaya.
Ula pyntip ba ka Sorkar Jylla mar syn ioh jingtip ia kane ka kam, kala buh haduh 800 tylli ki kor computer ha kylleng ki jaka pule bad ia ka thup jong kine ki jaka pule ban pynlong kum ki centre thoh eksam, la ai jingtip ruh sha ka NTA.
Ka NTA kala thung ia ka Tata Consultancy Services (TCS) kum ka agency ka ban khmih bad pynshisha ia ki centre ki ban pyndonkam da ki kor computer. Kane ka dei ka kam kaba hap leh ka ban shimpor katto katne sngi bad ka jingjurip ia kine ki centre kala iaid shakhmat.
Ha kajuh ka por, une u OPhisar ula ong ba ka Tnad Education ka sngewnguh ia ka jingkyrshan jong ki skul bad ki college ha kylleng ka Jylla Meghalaya kiba la wan shakhmat ban tyrwa ia ki computer lab na ka bynta ban pynlong ia ka eksam CUET.
Ula ong ba ka NTA kala pyntip ba baroh kito ki samla pule kiba dei iakhun ia ka eksam hadien ka 16 tarik Jymmang, 2025, kiba la jied ban thoh ia ka eksam ha Meghalaya hynrei kila shah pynngat shabar ka Jylla, kin sa ioh noh ia ki centre hapoh ka Jylla Meghalaya.
Halor kane, ka Tnad Education kan sa pynthikna lashai lane lashisngi.
