Nongpoh, Jymmang 13 : U Myntri ka tnad ialehkai ka Jylla bah Shakliar Warjri, ha ka sngi Ba-ar, ula buh ia u mawnongrim ban tei ia ka madan ialehkai phutbol artificial turf ha ka shnong Nongsder, Ri-Bhoi District.
Kane ka project madan ialehkai ka dei kaba la mang ban pyntrei ha ka jinglut kaba kot T.10 klur.
Ia kane ka jingbuh mawnongrim la sakhi ruh da u MLA ka Umroi Bah Damanbait Lamare, u Chie Secretary ka Jylla Bah DP Wahlang, ki Ophisar ka Tnad Ialehkai, u Rangbah Shnong ka Nongsder Bah Jonas Lyndet bad kiwei kiwei.
Kane ka project ka ban pyntrei ha ka madan ialehkai phutbol ka shnong Nongsder, kan kynthup ia ka jingsiang phlang plastic, ki kamra khreh ki nongialehkai, ka jaka shong peitkai bad kiwei kiwei.
Haba ai jingkren ha ka jingialang, u Myntri ula pynpaw ia ka jingkmen ban iadonlang ha kane ka sngi ka ban sah jingkynmaw ia ki paid nongshongshnong ka Nongsder, ki ban sakhi ia ka jingurlong ka jingphohsniew ban ioh ia ka madan ialehkai phutbol kaba bit bad kaba paka.
Ula pyntip ba kane ka project kala wan sha Nongsder da ka jinglah ban buddien bad jingtrei shitom jong u MLA ka Umroi, uba la iai ud iai nam na ka bynta ki paid nongshongshnong ka thain.
