Shillong, Jymmang 12 : Ka Sorkar Jylla kala hukum ia ka jingpynbujli kam kaba heh bha ha ka Tnad Pulit, da kaba pynkynriah haduh 14 ngut ki Ophisar IPS bad MPS ha kylleng ka Jylla.
Kat kum ka jingpynbna bala pynmih da u Principal Secretary ka Tnad Pohiing Bah DR Kharkongor ha ka sngi Ba-ar, ia kane ka hukum la pynmih halor ka jingai jingmut jong ka Civil Services Board bad ka Police Establishment Board, ka ban treikam noh naduh ka sngi ba leit shimti ia ki kam.
Ha ka kyrdan DIG, u Jerry Fisher K Marak, IPS ula shah pynkynriah na Western Range, Tura sha ka Eastern Range, Shillong katba u Vivekanand Singh, IPS ula rah na Eastern Range sha Western Range, Tura.
Napdeng ki Commandant jong ki Battalion, u Siddharth Kuar Ambedkar, IPS ula shah pynkynriah na ka 5th MLA Battalion, Samanda ban shim kum u khliehduh ka 6th MLP Battalion, Umran.
Uba hashuwa jong u ha Umran, u Ashish, IPS, un shakri mynta kum u Superintendent of Police, Vis, Shillong.
U bah Stephen A Rynjah, MPS, uba dei u SP ka East Garo Hills, ula shah thung kum u Commandant ka 5th MLP Bn, Samanda.
Ha ki kyrdan jong ki District, u Shailendra Bamaniya, IPS ula shah pynkynriah kum u SP ka South Garo Hills, Baghmara sha ka kam SP, CID, Shillong bad u Ringrang TG Momin, MPS un shimti ia ka Baghmara na CID.
U Pawar Swapnil Vasantrao, IPS ula shah rah na North Garo Hills sha East Garo Hills kum u SP katba u Ishan Gupta, IPS ula shah rah naka CM Security sha North Garo Hills. U Naman Kumar, IPS un khlieh mynta ia ka CM, Security, Shillong.
Ha sor Shillong, u Bah Dangsan Khyriem, MPS ula shah thung kum u SP City, ba bujli ia u Dewansh Pandey, IPS, uban shimti mynta kum u Assistant Inspector General of Police (Law & Order).
U Bah Geffry Waemhok Lyngdoh, MPS ula shah pynkynmaw naka ka AIG (L&O) sha ka kam SP ka Eastern West Khasi Hills, Mairang. U Hari Prasant M.R, IPS ula shah thung kum u SP (Traffic), East Khasi Hills.
Ka Sorkar ka ong ba baroh kine ki jingbhah kam la leh na ka bynta ka jingbha ka jingshakri paidbah bad kan iai treikam tad haduh da pynmih da kawei pat ka hukum.
