Shillong, Naitung 30: Ka KSU Sawsymper Circle, Balat Border Area Circle bad ka Lawbah Border Area Circle hynne ka sngi kala pynbna daka jingiakhih shong kyllain mongor ha Mawsynram haka 10 tarik Nailar.
Ia kane ka KSU, kala pynbna kum shi bynta ban pyrshah iaka jingleh mynthi ka Sorkar Jylla haba iadei bad ka jingdawa kyntiew kyrdan iaka Mawsynram C&RD Block shaka Civil Sub-Division.
Haba pynbna ia kane, u General Secretary ka KSU South West Khasi Hills, samla Jiedskhem Nongsiej ula kam ba kane ka jingdawa kam dei tang jong ki sengbhalang hynrei kadei jong baroh ki nongshong shnong ka thain Mawsynram ia kaba la dawa naduh u snem 2018.
U samla Jiedskhem ula iathuh baka Mawsynram CRD Block ka dei kawei nako Block bala rim tam hapoh Meghalaya.
“Ka Mawsynram CRD Block ka don iaka jingheh kaba ym duna iaka 5000 sqkm, ki don palat 162 tylli ki shnong bad ki don palat 44000 ngut ki nongshong shnong” ong u samla Jiedskhem.
U la ong ba jingdawa kyntiew kyrdan iaka Mawsynram CRD Block shaka Civil Sub-Division ka long kaba donkam palat namar, kala jngai palat iaki nongshong shnong ban kiew sha Nongbah Shillong ban pyndep iaki kam ki jan, nalor ba sniew surok.
“Ka Mawsynram ka jngai palat 60 km na Shillong, bad ki don ruh ki shnong shnong kiba don haki thain khappud kiba jngai palat 90 km bad kane ka buh jingeh bha iaki paidbah ban wan kiew barabor sha Shillong ban pyndep iaki kam” ula ong.
U nongialam ka KSU South West Khasi Hills, ula kynnoh baka seng kala dep ruh ban thoh sha u Myntri Rangbah ban buh por ban ia kynduh hynrei haduh mynta ka seng ka khlem ioh kano kano ka jubab.
“Ka jingiakhih daka ba shong shong kyllain mongor ha Mawsynram haka 10 tarik Nailar kan dei tang ka jingsdang bad nangne shakhmat ka seng kan nang iai pynbor iaka Sorkar ban kyntiew kyrdan iaka Mawsynram CRD Block shaka Civil Sub-Division.
