Nongpoh, Naiwieng 07 : U Myntri ka Tnad Pule Puthi Rakkam A Sangma, hynne ka sngi Palei, ula kular ban pynioh noh da ka Iingskul ba thymmai ia ka skul Raitong Government Lower Primary, kaba la seng naduh u snem 1949 ha shnong Raitong, Ri-Bhoi District.
U Myntri ula pynbna ia kane ha ka jingialang rakhe ia ka jingdap 75 snem jong kane ka skul Sorkar, kaba la saindur bad pynnang pynstad ia ki heprit jong ka thain naduh u snem 1949.
Haba ai jingkren, u Myntro ula ai ka jingiaroh ia baroh ki bor pyniaid jong kane ka skul kiba la trei shitom ban ai jingnang jingstad sha ki khynnah bad ban kyntiew ia ka pule ka puthi ha ka dong ka thain.
U Rakkam ula pyntip ba ka Tnad Education kan sa pynioh noh ia ka Iingskul ba thymmai ia kane ka skul bad kumjuh ruh ia ki 6 tylli kiwei pat ki skul kiba don hapoh ka Mawhati Constituency.
“Ka jingnang jingstad ka long kaba kordor bha ban tei ia ka lawei jong u wei pa u wei u khynnah pule. Ka jinglah jong ka Raitong Government LP School ban nang bteng ia ka jingshakri mynta la 75 snem ka long shisha kaba dei ban ai jingiaroh naba kane ka shlem ai jingstad ka la nang kiew ruh wat hapdeng ka jingiaid lynti kaba khim bad ba dap da bun tylli ki dieng pynkiang”, ong u Rakkam A Sangma.
Ha kajuh ka por, u la kyntu ia ki kmie ki kpa lem bad ki nonghikai ban iatreilang ha ka ban kyntiew ia ka jingnang jingstad ha kine ki Shnong ki thaw khamtam ha ki shnong kyndong, bad ruh ba ki samla pule ki dei ban treishitom ha ki jingpule jong ki bad ruh ban pynmlien ban kren ia ki jaid ktien bapher bapher ban pynsuk ia ki haba ki leit ban bteng ia ki jingpule jong ki shabar ka jylla ne ka ri.
Kiba la iadonlang ha kane ka sngi ki kynthup ia u MLA/MDC ka thain Bah Charles Marngar, ka Additional Deputy Commissioner ka Ri-Bhoi Kong BL Pakyntein, ki Ophisar ka Tnad Education, ki Rangbah Shnong, ki Kmie Kpa, ki nonghikai bad ki khynnah skul.
Ha kane ka jingrakhe, la plie ruh ia u maw sahnam ka jingdap 75 snem lem bad pyllait paidbah ia ka souvenir ka skul. La pyniphuh iphieng ia kane ka sngi da ki jingrwai jingshad bad ki jingialehkai bapher bapher ba la ia shimbynta da ki khynnah skul ka Raitong Government LP School.
