Shillong, Nailar 25 : U Myntri ka Tnad Arts & Culture Bah Sanbor Shullai ha ka sngi Ba-ar ula pynbna ban sa shna bha biang ia u motdur jong u Subhas Chandra Bose bad Swami Vikenanda ba shah pynjulor ha RR Colony ha ka rally thuk thuk ka KSU.
U Bah Sanbor ula iathuh ba ka Tnad kan sa shna pynbha ia kine ki artylli ki mot haba burom ia ka synniang kaba khraw jong ki ha ka jingtei ia ka Ri.
Haba pynrem ia kane ka jingjia, ula ong ba ki jingiakhih ki dei ban long kiba jai jai bad ki kam thombor ki don ia ka jingktah kaba neh slem ia ka jingkiew shaphrang ka Jylla.
“Ngi kum ka imlang sahlang bala shai ngi dei ban pynthikna ba kino kino ki jingiakhih ki dei ban long kiba jai jai namar ka jingktah jong kino kino ki jingpynjulor ba mih na ki kam thombor ki dei kiba ktah jur ia ka jingkiew bad ka roi ka par jong ka Jylla” ula ong.
Haba pynpaw ia ka jingsngew ia kane ka jingpynjulor, ula kyntu ia ka seng ki samla pule bad ki samla ba kin shim ia ka jing hikai na ki jinghikai jong kine ki arngut ki riewkhraw ka Ri.
