Shillong, Jymmang 15 : U Myntri Rangbah Duh ka Ri Narendra Modi ula thep kyrteng kum u kyrtong ban iakhun ia ka elekshon Lok Sabha na Varanasi Lok Sabha Seat ha ka sngi Ba-ar, kaba ula jop arsien ia ka elekshon na kane ka constituency kaba don ha Uttar Pradesh.
U Narendra Modi ha ka affidavit bala thep lang bad ki kot ki sla, ki pynpaw ba u don spah ba kot T.3.02 klur da ka pisa ba kiwei ki mar ba lah ban rong ban rah, kaba kiew na ka T.1.41 klur kat kum ka affidavit jong u snem 2019.
Ula pynpaw ruh ba u dei u briew u bym don satia ia ka kali ne ka Iing ka sem bad u bym shah ram hangno hangno ruh. Ha ka affidavit la pyni ruh ba um pat don satia kano kano ka kam bymman bala register pyrshah ia u.
Ka affidavit ka pynbna ruh ba u don iaka pisa ha kti tang T. 52,920. Kumba long ha u 2019, u PM u don tang saw tylli ki sati ksiar kiba khia 45 gram bad ba shongdor T, 2.68 lak ha ka iew mynta.
Ka affidavit ka pyni ruh ba u PM ula pyndep ia ka BA na Delhi University ha u snem 1978 bad ia ka MA na Gujarat University ha u snem 1983.
U Modi ula pyni ruh ha ka affidavit ba u don ia ka spah ba lah ban kit ban rong kynthup ka fixed deposit ba kot T. 2.85 klur hapoh ka State Bank of India (SBI) bad T. 80,304 ha ki artyli ki Bank Account ha Gandhinagar bad Varanasi. U don ruh T. 9.12 lak kum ka jingkynshew hapoh ka National Saving Certificate (NSC) saving scheme.
Ka tyllong kamai pisa jong u PM Modi ka dei tang na ka tulop Sorkar bad ka sut ba u ioh na ka jingkynshew pisa ha bank.
