Shillong, Jylliew 29: Ki bor District ka East Khasi Hills kin sdang iaka jingleit rung thliew iing naduh ka 30 tarik Jylliew ban leh iaka Special Intensive Revision (SIR) kum ka sienjam ban pynshisha iaki kyrteng jong ki nongthep Vote haka Electoral Roll kiba don ha baroh ki constituency ba hap hapoh ka District.
Haba kren shaki lad pathai khubor u Deputy Commissioner (DC) ka East Khasi Hills Abhilash Baranwal u la kyrpad ïa baroh ki nongthep vote ba kin shimkhia bad ïatreilang haka jingwan leh iaka SIR ka ban sdang naduh ka 30 tarik Jylliew bad bteng haduh ka 29 tarik Naitung.
U Abhilash ula ong ba kane ka jingleit rung ha man ki thliew iing daki Booth Level Officers (BLOs) ka dei katkum ka jing bthah ka Election Commission of India (ECI) bad kine ki BLOs kin leit sha man ki thliew iing kiba don ha baroh ki constituency ka East Khasi Hills.
U la pyntip ba ki 1,021 ngut ki Booth Level Officers (BLOs) kin leit sha man la ka ïing ban sam ïa ki Self-Enumeration Form kiba la dep pyndap lypa ïa ki nongthep vote kiba don ha ka thup kyrteng thep vote (Electoral Roll) 2025.
La kyrpad ïa ki paidbah ba kin pyndap hok ïa kine ki Form bad ban aiti biang sha ki BLO.
U Deputy Commissioner u la kyntu ïa ki paidbah ba kin shimkhia ïa kane ka kam bad kim dei pat ban sheptieng namar ka jingthmu jong kane ka kam ka long ban pynthikna ba ym dei ban don uno uno u nongthep vote uba don hok ban shah iehnoh shadien hynrei ban pynrung ïa baroh ha ka Electoral Roll.
“Ka jingthmu jong ka Special Intensive Revision ka long ban pynrung ïa ki nongthep vote kiba don hok ha ka Electoral Roll bad ym ban weng ïa ki,” u la ong. U la bynrap ruh ba kane ka jingleit sha man ki thliew iing ka long ban pynkhuid, pynbeit bad pynbiang ïa ka electoral roll khnang ba kan long kaba thikna bad khlem jingbakla.
Ula batai ba ha ka por jong ka jinglum jingtip (enumeration), ym donkam satia ban aiti kino kino ki kot jingïoh jingithuh. Ka kam kaba ki nongthep vote ki hap ban leh ka long tang ban pyndap bha ïa ka self-enumeration form bad aiti sha u BLO. Tang ha ki katto katne ki khep ba donkam yn sa kyrpad ïa ki paidbah ban wanrah ïa ki kot jingïoh jingithuh.
Ka Election Commission ka la pynmih ïa ka thup jong 11 tylli ki kot jingïoh jingithuh kum ka jingai nuksa hynrei kane kam mut ba tang kita ki kot yn pdiang. Ua Deputy Commissioner u la ong ba la bthah ïa baroh ki BLO ba kin pdiang ïa kano kano ka kot kaba wanrah da ki nongthep vote, kynthup ïa ki certificate na ka Balang, na ki Rangbah Shnong lane kino kino ki kot kiba don jingïadei. Ka rai kaba khatduh halor ka hok jong uno uno u nongthep vote kan long ha ka kti jong u Electoral Registration Officer (ERO) hadien ba la bishar ïa baroh ki kot ba la aiti.
Hadien ba kut ka jinglum jingtip, yn ai sa shi bnai ka por ban pdiang ïa ki jingkam kyrteng bad jingpyrshah. Hadien kata, ki ERO kin shim sa shi bnai ban bishar bad rai halor kine baroh shuwa ban pynmih ïa ka Final Electoral Roll ha ka 7 tarik Risaw 2026.
U Deputy Commissioner u la ong ba ka 2005 Electoral Roll ka dei ka nongrim jong kane ka jingjurip namar ka dei ka sien kaba khatduh ba ka Election Commission ka la pynlong ïa ka comprehensive revision jong ka electoral roll ha ka ri.
La pyntip ruh ba ki paidbah ki lah ban pyndap ïa ka self-enumeration form lyngba ka website jong ka Election Commission of India. Ki paidbah kiba donkam jingïarap ki lah ban phone sha u BLO jong ki, lane sha ka 1950 Helpline jong ka Election Commission.
Nalor kata, ka District Administration ka la plie ruh ar tylli ki helpline numbers ban ïarap ïa ki paidbah, kata 0364-2501255 bad 0364-2501228.
U Deputy Commissioner u la kyntu ruh ïa baroh ki samla kiba la dap 18 snem bad kiba dang ym pat don kyrteng ha ka electoral roll ba kin pyndap ïa ka Form 6 khnang ba yn lah ban pynrung ïa ki kum ki nongthep…
 kum ka sienjam ban pynshisha iaki kyrteng jong ki nongthep Vote haka Electoral Roll kiba don ha baroh ki constituency ba hap hapoh ka District.){kind=link}