Shillong, Jylliew 29: Ka Joint Action Committee (JAC) kaba mihkhmat ia ki trai trok na Jaintia Hills ka la pynrem jur ia ki khubor ba kynnoh ba ka pynbor ia ki dkhot ban synniang pisa ban pynlong jingialang ai khublei ia ki Myntri Sorkar Jylla, da kaba shim ia katei ka jingkynnoh ba kadei ka jing lamler bad kaba thmu ban pynjah burom ia ka JAC.
Ka JAC kaba kynthup iaka East Jaintia Hills Truck Owner’s & Transporter Association bad ka Jaintia Hills Truck Owner’s Association, ka la kynthoh tyngeh ïa ka khubor ba la mih ha ki kotkhubor, ba kynthup ïa kawei ha ka kotkhubor The Shillong Times ha ka 28 tarik Jylliew 2026, ba kynnoh ba ka dawa T.1,000 na ka bynta kawei ka trok ban ai burom ia u Symbud Myntri Rangbah ka Jylla.
“Ka JAC ka kyntait shi syndon ïa kane ka jingkynnoh lamler,” ong ka kyrwoh ba la pyllait da u President ka JAC Bah Kyrshan Dkhar jong ka East Jaiñtia Hills Truck Owner’s & Transporter Association bad u Bah Biangshwa Shylla jong ka Jaintia Hills Truck Owner’s Association.
“Ka JAC kam shym la thmu ne pynkhreh ban lum pisa ha kum kane ka rukom, bad kam shym la pynbor bad kan ym pynbor ia ki trai trok ban siew pisa ei ei”.
Ka JAC ka la pynthikna ba ka pynlong ia ka jingai khublei ia ki 3 ngut ki Myntri Sorkar ha State Library, Shillong ha ka 1 tarik Naitung 2026, hynrei ka la ban jur ba ia kane ka jinglehkmen yn bei pisa tang da ka JAC.
“Ha kaba ïadei bad ka jingthmu ban pynlong ïa ka prokram ai khublei, ka JAC kan kit hi ïa baroh ki jinglut jingsep, ym da kaba pan pisa, pan jingïarap, ne dawa pisa na ki dkhot ne ki trai trok” ong ka kyrwoh.
Ka JAC ka la kynnoh ba ki khubor ki dei shi bynta ban pynjah burom ia ka. “Ka JAC ka sngewthuh ba kane ka jingkynnoh ka dei tang ka buit sniew kaba thmu ban pynjah burom bad pynsniew dur ïa ki nongrim bad ka nam ba bha jong ka JAC hakhmat ka imlang sahlang,” ka la ong.
Ka la kyrpad ïa ki trai trok bad ki dkhot ban nym sngap ïa ki jingkynnoh da kaba ong ba kine ki jingkynnoh bad ki jingkren beiñ kidei ki bym don nongrim.
 kaba mihkhmat ia ki trai trok na Jaintia Hills ka la pynrem jur ia ki khubor ba kynnoh ba ka pynbor ia ki dkhot ban synniang pisa ban pynlong jingialang ai khublei ia ki Myntri Sorkar Jylla, da kaba shim ia katei ka jingkynnoh ba kadei ka jing lamler bad kaba thmu ban pynjah burom ia ka JAC.){kind=link}