Shillong Naitung 13: U Myntri Rangbah ka jylla u Conrad K Sangma, hynne ka sngi u la lum iaka jingialang bad ki Deputy Commissioners bad Superintendent of Police ha nongbah Shillong bad la shim ia ka rai ban pyntreikam ia ki katto katne ki project ban pynkhlain iaka rukom ai jingshakri haka liang ka koit ka khiah, ka pule puthi bad ha ka tnad Pulit.
U Conrad Sangma u la pyntip ba kane ka jignialang kala iatai halor ka jingshah pynjulor haka bor mariang, hadien ba kala don ka jingshlei um bad jingther u lapbah lapsan ha ka jylla.
“Haba iatai ia ka jingshah pynjulor ki jaka rep jaka riang bad ki jingtei bapher, ka long ruh kaba donkam ban iatai iaka jingpynkhreh ia ka jingwan lynshop ka bor mariang ha ki por ban wan ha ryngkat bad ka shim ia ki sienjam kiba biang ban pynduna iaka jingshah pynjulor ha ka bor mariang” ong u Conrad.
Ka jingialang kala iatai ruh iaka jingdonkam ban pynbha iaki jingtei bapher bapher kum ki skul, Police Station bad ki jaka ai jingsumar.
La rai ruh ban maramot bad pynbha ia ki Lower Primary School jongka sorkar, ha kaba iaka jingmaramot ne jingpynbha yn pyniaid lyngba ki DRDA ryngkat bad ki District Level Committee, ki ophisar jong ka pule puthi, ban pynthikna ba ka jingpynbha bad jingmaramot kan kynthup ruh iaka jingpynbiang iaka um, ka bording elektrik, ki shuki ki miej.
Ka jingmaramot bad jingpynbha kan long ruh kumjuh ia ki jaka ai jingsumar kum ia ki PHC bad CHC bad wat ia ki Police Station.
“Kum kitei ki kam maramot ki hap ban iaid lyngba ki tnad sorkar bapher bapher bad kane kala pynslem ban ioh pynbha, kumta mynta ki District kin leh hi iaka kam maramot ha ki District ki jongki ban pynthikna ba ki kam ki jam kin long kiba kloi” la ong u Myntri Rangbah.
U Myntri Rangbah ula plie ruh iaka jingsdang pyntreikam iaka National Generic Document Registration System, Chief Minister’s Social Assistance Scheme na ka bynta ki PwDs, Online Submission of Annual Property Returns, Online Citizen Centric Service for Ration Card bad ka Online Booking of Tickets na ka bynta ki bus MTC.
Hadien katei, u Myntri Rangbah u la leit iashimbynta haka jingialang bad ki Superintendents of Police bad la shim ia ka rai ban pynbiang da ki kali kiba thymmai ha ki 76 tylli ki Police Station jong ka jylla.
“Ki police station ym tang ba ki pyndep ia ka kamram ban pynneh iaka shongsuk shongshngain hynrei kidei kiba nyngkong eh kiban iadei kam bad ki paidbah haba don kino kino ki jingjia bad kiba shah tynrong bun ka kam haba don kino kino ki jinghuri hura” ong u Conrad.
U la ong, yn pynkhlain ia baroh ki police station da kaba buh ia ki computer bad ki kor ki bor bad ia ki kali khwai bad ki kali kit nongpang ha ki jaka kiba jur bha ka jingdheng kali bad ka jingtakhuh kali bad ban pyrkhing iaka jingiaid ki kali bad ban khmih bniah iaka jingiaid ki kali khamtam ha East Khasi Hills yn pynbiang sa 60 tylli ki thuk thuk.
Haka SP Conference la rai ruh ban pynbiang jaka sah na ka bynta ki pulit bad kane kan iaid da ka pali bad ban sdang ruh ban ai iaka khusnam Chief Minister’s Police Medal bad Chief Minister’s Disaster Response ban nang ai mynsiem ia ki pulit bad ban pyni iaka jingsngewburom naka liang ka sorkar jylla.
