Shillong, Iaiong 03 : U Myntri Rangbah ka Jylla Conrad K Sangma, ula pynbna ia ka song pisa ba T. 50 lak ban shna ia ka Karbi Cultural Centre haba pynpaw ruh ba baroh ki Jaidbynriew ba sah ha Meghalaya ki dei kiba la niew kongsan kumjuh hakhmat ka Sorkar Jylla.
U Myntri Rangbah ula pynbna ia kane ha ka jingilaang Rakhe ia ka Golden Jubilee jong ka All Meghalaya Karbi Association (AMKA) ba long hynne ka sngi Palei ha Purduwa Kharpati, Ri-Bhoi District.
Haba ai jingkren, u Conrad ula pynkynmaw ia ka synniang jong ki Nongialam Karbi – (L) Valerian Hing Timung, (L) Jaipo Thang Taro, Dominic Timung, Joy Taro bad Chikraw Timung, kiba don bynta ha ka jingialeh ka Meghalaya ban ioh Jylla la ka jong.
“Ki kyrteng jong ki, ki dang im bad ngi haduh mynta bad ngin ym lah ban klet noh ia ka jinglen lade jong ngi. Ki para Karbi jong ngi kila pynlut da ki bnai ha aling haba iakhun pynioh ia ka Jylla jong ngi, kaba pyni ia ka jingiadei kaba khlain hapdeng ki paid Karbi bad ka Meghalaya” ula ong.
Haba ai khublei ia ki dkhot ka AMKA, u Myntri Rangbah ula ai jingithuh ia ka synniang jong ki nongseng ka AMKA, kiba la trei ha kine ki 50 snem ban pynneh pynsah ia ka kolshor ba riewspah jong ki Karbi.
Haba kren halor ka histori bad ka jingialong shipara hapdeng ki jaidbynriew riewlum jong ka Jylla, u Myntri Rangbah ula ong “Ngi lah ban don ia ki Jaidbynriew kiba heh paid bad ki riewlum ha ka Jylla, hynrei nga kular ba man ki nongshong shnong ka Jylla, kam pher ki dei na ki paid riewlum aiu, kam pher ka niam aiu phi ngeit….ban im ha Meghalaya bad ban long ki nongshongshnong ka Meghalaya, ka pynlong ia phi kaba long kongsan kumjuh hakhmat jong ngi….bad ka dei ka kamram jong man uwei pa uwei u nongialam bad ka Sorkar ban pynthikna ia ki kam pynroi ha baroh ki liang bad ka jingiada bad ka hok la ai sha ki briew kiba sah ha ka Jylla Meghalaya jong ngi”.
Haba kren halor ka jingkongsan ban pynneh ia ka jingbun ki nongshongshnong na ki jaidbynriew bapher bapher bad ka kolshor ha Jylla, u Myntri Rangbah ula ong ba ka Sorkar kala kyrshan ia ki kynhun ritpaid bapher bapher ha ka Jylla ba kin pynneh pynsah ia la ka kolshor bad ki jingleh tynrai.
“Ka thong jong ka Sorkar ka long ban pynthikna ba man ki Jaidbynriew kin sngew ba ki shah kynthup lang. Ka kolshor ka dei kaba kongsan ia ka jingithuh kyrpang jong ngi bad ka dei kaba pynlong ia ngi kumne kumba ngi long-la ka dei ki Khasi, Garo, Rabha, Koch, Hajong lane Karbi” ula bynrap.
Halor ki jingeh ha ki jaka ba iakajia pud hapdeng ka Assam-Meghalaya, ula ong “Kala don ka jingpyrshang na ka liang ka Sorkar Assam bad Meghalaya bad ka Karbi Anglong Autonomous Council ban pynthikna ba ngin iatreilang bad ban pynneh ia ka jingsuk”.
