Shillong, Nailur 29: U Myntri Rangbah ka jylla Meghalaya u Conrad K Sangma hynne ka sngi Nyngkong ula leit ban iashimbynta ha ka jingrakhe jong ka jylla ia ka World Tourism Day kaba la pynlong ha Marriot Courtyard, Shillong.
Haba kren kum u kongsan ha kane ka sngi, u Myntri Rangbah, u Conrad K Sangma, u la ong ba kala don shibun ka jingkylla kaba la jia ha ka liang jong ka kam jngohkai pyrthei ha kine ki khyndiat snem kiba la leit naduh ba ka sorkar kala shim ia ka tnad tourism kum kawei na ki projek ba khraw.
“Ngi la sngewthuh ïa ki lad ki lynti kiba khraw ha kane ka bynta ha kaba ïadei bad ka jingpynmih kam bad kumjuh ruh ha kaba ïadei bad ka jingïakhun kaba ngi kum ka jylla ngi don ha kane ka bynta bad khatduh ngi la sdang ban ïohi ïa ka jingktah jong ki sienjam ba la shim ban pynbha ïa ka sawdong sawkun jong ka kam jngohkai ha baroh kawei ha ka jylla,” ula ong da kaba pynshisha ba ha u snem 2024 ka jingpoi ki nongjngohkai na ki jylla bapher bapher kala kot haduh 16 lak ngut tam bad 2.3 ngut ki dei ki nongjngohkai kiba wan na ki ri bapher bapher.
“Kine ki jingkheiñ ki long ka jingpynshisha ïa ki jingkylla kiba ngi ïohi ha ka kam jngohkai pyrthei bad ka jingroi ka long kaba ïaid beit bad kaba neh bha ka jingmih na ki polisi bad ki buit treikam ba la thmu ba la buh ha ka jaka,” ula ong.
Haba kren shaphang ka jinglah ban ai kam ai jam ha ka kam jngohkai pyrthei u myntri rangbah ka jylla u la pyntip ba kumba 50 hajar ngut ki briew ki dei kiba ioh kam (direct ne indirect) bad ka thong jong ka sorkar ka long ban thaw kam sa 50 hajar ngut. Ula ban jur ruh ba wat kumba ka jylla ka la pyrkhat ia ka jingkiew ha ka ioh ka kot na ka bynta ka jylla, hynrei ka jingkiew ha ka ioh ka kot kan long lyngba ka kam jngohkai, ka rep ka riang, ki karkhana, IT bad kiwei kiwei ki bynta kiba ktah ia ka jingim jong uwei pa uwei u nongshong shnong jong ka jylla.
U Sangma u la pyntip ruh ba mynta ki don kumba 210 tylli ki jingtei kiba iadei bad ka kam jngohkai kiba shongdor kumba T.3625 klur kiba dang pyntreikam ha kylleng ka jylla. Ula batai shuh shuh ba ka jylla ka don ka jingduna kaba khraw ha ka jingdon ia ki kamra kumta la donkam ban don shibun ki homestay hapoh ka jylla lyngba ka mission mode.
“Kine ki Homestay kiba ngi dang pyrshang lyngba ka Chief Minister’s Meghalaya Homestay Mission kin long kum ki jaka sah na ka bynta ki nongïalehkai ha ka por ba pynlong ïa ka National Games 2027 ha Meghalaya bad hadien ka jingïalehkai kin pynbiang ïa ki jingdonkam jong ki nongjngohkai pyrthei kiba wan sha kane ka jylla,” u la ong.
Shuh shuh u la ong, ba kane ka rukom kan pynduh noh ïa ka jingdonkam ban thaw ïa ka Games Village kaba ju wanrah ïa ki jingeh hadien ki jingïalehkai. Ula pyntip ruh ba ka Sorkar India lyngba ka tnad DoNER kala mang pisa sa kumba T.260 klur hapoh ka PM-DevINE na ka bynta ban kyntiew ïa ka kam jngohkai pyrthei ha Sohra bad ki jaka ba marjan.
Haba kren shaphang ka jingpyniasoh ne ka (connectivity) kadei ka daw bah na ka bynta ka jingroi bad jingkiew jong ka kam jngohkai pyrthei, u myntri rangbah u la pyntip ba ha kaba sdang jong u snem 2027 ka jingpynheh ia ka kad liengsuin ha Umroi kan pynsuk ia ka jinghiar ki liengsuin kiba kham heh na ki nongbah bapher bapher jong ka ri. U la pynshai ruh ia ki projek kiba dang don ha ka jingthmu ban pynbha ia ka tourism ecosystem ha Meghalaya khnang ban lah ban shim ia ka jingwan ki nongjngohkai pyrthei ha ki por ban wan.
U Myntri Rangbah ka Jylla u la kren ruh shaphang ka jingmut jong ka concert economy kaba u Myntri Rangbah u ju kdew bunsien da kaba ong, “Kane ka dei ka jingmut kaba ngi la pyntreikam la slem bha bad kine ki kam kim kyntiew tang ïa ka kam jngohkai pyrthei hynrei ka jingmih kaba mih na ki concert ka kham heh bha ban ïa kaei kaba ka sorkar ka bei tyngka ha kine ki nongpynïaid,” ula ong bad pyntip ruh ba ka sorkar ka pynlut 23.5 klur ha u snem 2024-25 hynrei ka jingioh khajna ka long 133.43 klur.
“Ngi la lah ban pynithuh ïalade kum kawei na ki jaka ha kaba ki nongrwai ba pawnam ha ka pyrthei hi ki kwah ban rwai ha Shillong bad kane ka dei kaei kaei kaba kyntiew ïa ka ïoh ka kot jong ngi,” u la bynrap.
Ha kaba kut u myntri rangbah ula ong ba baroh ki jingpyrshang ban thaw ia ka sawdong sawkun na ka bynta ban pynthikna ba ka kam jngohkai pyrthei hapoh ka jylla kan kiew shaphrang bad kam don jingmut lada ki nongjngohkai pyrthei kim don ia ka jingsuk, kaba sah jingkynmaw, kaba shngain. “Ka dei ka kamram jong uwei pa uwei u nongdon bynta ban pynthikna ba uwei pa uwei u briew uba wan jngoh ia ka jylla jong ngi un mih noh da kaba sngewtynnad”, u la ong.
U Myntri Rangbah u la plie paidbah ruh ia ka Meghalaya Tourism Helpline Number 1800-599-2026 kaba dei kaba nyngkong eh hapoh ka ri India. Kane ka helpline ka don ha ki hynniew tylli ki ktien kiba ai ïa ka jingshngaiñ, jingsuk bad ki jingtip kiba lah ban shaniah kiba treikam man la ka sngi naduh ka por 8 baje mynstep haduh 8 baje mynmiet.Kane ka sienjam kan pynkhlain ia ka dur jong ka jylla Meghalaya kum kawei na ki jaka ba shngain bad ka jaka kaba iadei paralok bad ki nongjngohkai pyrthei.
La pyllait paidbah ruh ia ka Chief Minister’s Meghalaya Homestay Mission kaba ai haduh 70% ka Subsidy. La plie paidbah ia kane ka Mission da ka jingthmu ban shna haduh 3 hajar tylli ki home stay, ban pyndap 6,000 tylli ki kamra kiban pyndap ia ka jingduna kaba la buh jingkhein ha u snem 2028. Ki nongseng kam kam kiba ym shym pat ioh jingiarap ia ka Meghalaya Homestay Scheme kin sa ioh ia ka grant haduh T.2 lak.
Shuh shuh dei ban tip ba kane ka dei ka skhim kaba pynshong nongrim ha ka longïing, kaba ailad ïa uwei u dkhot na kawei ka longïing ban aplai la ka long na ka bynta ban shna thymmai ia ki homestay ne ban pynbha ia ki. Ka Mishon kan dang bteng ruh ban iarap ia ki nongseng kam seng jam kiba tbit, ba la kyrshan da ka MSSDS, FCI Tura, bad IHM Shillong. Hapoh ka skhim kaba lah dep, palat 600 ngut ki trai ïing kiba la shah hikai pyntbit lyngba ka Entrepreneurship Development Program ban pyntreikam ha ka lynti kaba iaid beit iaid ryntih.
Hapoh ka Meghalaya PRIME Tourism Vehicle Scheme, u Myntri Rangbah ka Jylla ula pynher lama kum ka jingpyllait sa 10 tylli ki kali bad la pynkup burom ruh ïa ki nongïoh ïa ka Community-led Tourism Infrastructure Scheme da u Myntri Rangbah ka Jylla. Kumjuh ruh la sam ïa ki khusnam sha ki Outlook Magazine’s Responsible Tourism Awards, ia kine ki khusnam la na ka bynta ka jinglong nongialam ha ki Homestay, B&B & Guest House, Travel Enterprises, Musical Enterprises, Food, Nature Conservation, Cultural Ambassadors bad ka Overall Outlook Responsible Tourism Award la ai sha ka Living Bridge Foundation.
