Tura, Naiwieng 28 : U Myntri Rangbah ka Jylla Conrad K Sangma ha ka sngi Thohdieng ula pynlait ia ka roadmap ne ka lynti iaid na ka bynta ki kam pynroi ha Tura, haba pynbna ia ki jingkynshew pisa kiba heh ha ka kam pdiang briew (hospitality), ka transport, kam jngohkai bad ki jingtei ba kongsan katba ka Jylla ka dang pynkhreh ia ka jingwan ka National Games 2027.
Ia kine ki jingpynbna la pynsngew ha ka jingialang “Tura Beautification “Heal the World” bala pynlong ha District Auditorium.
Kum ka jingpynkhlain ia ki kam pdiang briew ha ka thain, u Conrad ula pynbna ba ka Hilton Group kala jop ia ka tender ban shna ia ka five-star hotel ba T.145 klur ha Tura, ha ryngkat ka jingiatreilang bad ka Park Hotel Brand. La khmih lynti ban pyndep ia kane ka hotel hapoh ka 36 bnai bad kan dei ruh ka luxury hotel ba nyngkong eh ha ri-lum Garo.
Naba ka Tura ruh kan ioh pynlong ia 6-7 tylli ki jingialehkai jong ka National Games, u Myntri Rangbah u pyntip ba ka sor ka donkam kumba 600 tylli ki kamra ia ki nongialehkai bad ki official. Ha ka jaka ban shna ia ki Games Village ba ju leh baroh shikatta, ka Sorkar kan pynkhlain noh da ka jingpynbun ia ki homestay ha kaba ka Sorkar kan ai 60% ka subsidy ia kiba briew ba kin shna ia ki iingbasa ba don 10 jingthiah.
“Kine ki Unit hadien kin sa kylla long pat ki iingbasa na ka bynta ki nongwan shangkai pyrthei” ula ong haba bthah ia ka Area Development Committee ban pynsted wut wut ia ka jingbishar ia ki aplikeshon jong 30-25 ngut ki briew ba dang shu aplai, da ka jingthmu ban pynkha haduh 350 tylli ki kamra hapoh kane ka skhim.
Haba tynruh ia ka jingpyndonkam ia ki kali kibym pyn jaboh mariang, u Myntri Rangbah ula pynbna ba ka Tura kan sa kylla noh ka jaka ban pyndonkam da ki kali elektrik ba kot 100% hapoh u 2027, da kaba wanrah ia ki electric auto bad ki bos. Ka jingiakren bad ki Association ki auto kan sa sdang shen ban pynduh noh ia ki auto ba iaid da ka petrol.
U Conrad ula khot ruh ia ki trai jaka bad ki shnong ki thaw ba kin iatreilang bad ka Sorkar ha kaban shna ia ki Childrens Park, ki madan ialehkai, ki jaka iaid kjat ki briew bala rangbah, haba kular ba ka Sorkar kan sa shna ia ki jingtei bad aiti ia ki sha ki Committee jong ki shnong ki thaw ba kin pyniaid.
Halor ki jingsngewkhia ba nang jyllei ki nongdih droks, u Myntri Rangbah ula ong ba ka jingdih droks kala dei ka jingeh kaba khraw bad ula pynbna ia ki jingthmu ban buh noh ia ki Rehabilitation Centre ha man ki district hapoh kine ki 3-6 bnai ban wan. Ka Sorkar kan sa pyndait ruh ia ki kot CCTV, pynbun ia ki street light bad thaw ia ka kynhun peitngor ba iasyriem kum ki VDP ban pynkhlain ia ka jingshngain ka imlang sahlang.
Hapoh ka beautification project, ka Sorkar kala aiti ia palat T.38 lak sha ka Area Development Committee ba kan airong, pynkhuid ia ki shnong ki thaw, ban buh ia ki tin niut bad kiwei kiwei ha ki shnong ki thaw.
U Conrad ula tyrwa ruh ia ka skhim ban ai rong beit tang kawei ka rong ia ki jingtei ha sor Tura hapoh ka “Paint My City” project, ha kaba ka Sorkar kan ai ia ka rong sha ka shnong ban sa ithuh hashuwa jong ka National Games.
Hashuwa kane, ki Ophisar ba kynthup ia Chairman ka TMB JD Sangma bad Deputy Commissioner ka West Garo Hills Vibhor Aggarwal, haba ai jingkren, kila kren halor ka jingnang shai ki briew bad ka jingmih shakhmat ki shnong ki thaw ban iashimbynta ha ki prokram ka Sorkar.
, ka transport, kam jngohkai bad ki jingtei ba kongsan katba ka Jylla ka dang pynkhreh ia ka jingwan ka National Games 2027.){kind=link}