Shillong, Nailar 14 : Kum ka lynti ban plie lad ia ka iohkam iohjam ki samla trai shnong, u Myntri Rangbah ka Jylla Conrad K Sangma, hynne ka sngi Balang, ula pynbna ba ka Sorkar Jylla kan sa thung noh da ki trai shnong kum ki ‘Tourist Assistant’ ne ki nongialam lynti ia ki nongshang suwari khnang ban wanrah ia ka jingshngain ia kine ki briew kiba wan na shabar ka Jylla.
Ula pyntip ba kine ki ‘Tourist Assistant’ ki ban phong da ki uniform, kin long kum ki nongialam lynti ia ki nongshang suwari, ki ai ka jingiada bad kiwei kiwei ki jingtip sha ki nongshang suwari.
“Ka jingthmu hi ka long ban pynlong ïa ki nongwan shang suwari ba kin sngewshngaiñ bad ban pynthikna ba kin ïoh ïa ki jingtip kiba thikna,” u la ong haba kren ha ka jingïasyllok bad ki kynhun kiba pyniaid ia ki kam jngohkai pyrthei ha State Convention Centre ha Shillong.
Haba kren ia ka jingjia ba dang shen kaba la ktah ia ka kam jngohkai pyrthei, u Conrad ula ban jur ia ka jingdonkam ban iatylli ha ka ban leh eiei pyrshah ia kane. “Ngi dei ban ïatreilang ban pynrem ïa kum kine ki jingjia bad ban ialeh katba lah ban wanrah ia ka jinglong jingman kaba khring ia ki nongshang suwari” ula ong.
“Ngi la iakren bad ki nongialam Shnong, ki sengbhalang, bad ki kynhun ba don bynta ha ki kam jngohkai ban kyntiew ia ka kam jngohkai hapoh ka Jylla. Ha kine ki hynrew snem bala leit noh, ka Sorkar kala wanrah ia kiba bun ki kam ban kyntiew ia ka kam jngohkai khnang ban lah buh kyrdan bad pynpaw nam ia ka Meghalaya” ula ong.
U la kyntu ia ki Kynhun bapher bapher ba kin ia ai jingmut lang na ka bynta ban pynroi shuh shuh ia ka kam jngohkai pyrthei. “Ka jingthmu jong ngi kam dei tang ban pynbun ïa ki nongwan shang suwari hynrei ban thaw ruh ïa ki jingialam kai sha ki jaka jngoh kai ba phylla bad kiwei kiwei, ki ban nang pynsngewtynnad ia kine ki nongwan kai” ula bynrap.
Ka sorkar ka dang shna pynheh bad pynbha ia ki jingtei ha ki jaka jngohkai pyrthei, kynthup ia ki hotel, ki jaka sah, ki jaka bam, ki jaka iaid kai, bad kiwei kiwei kum ka skywalks bad museum.
Ha katei ka conclave, u Myntri Rangbah bad u Myntri kam jngoh kai bah Paul Lyngdoh ki la plie ruh ia ka autumn tourism calendar, kaba kynthup ia ki tarik na ka bynta ka Shillong Literary Festival kaba la ap khmih lynti bha ha ka 12-14 tarik u Nailur, Shillong Cherry Blossom Festival ha ka 15-16 tarik u Nailur, Me’gong Festival ha ka 16 tarik. 29-30 Nohprah, ka The Hills Festival ha ka 6-7 tarik December, u Bryan Adam India Tour ha ka 10 tarik bad Winter Takes ha ka 12-14 tarik December, bad kiwei kiwei.
La pynbna ruh ia ka jingiatreilang bad ka Japan kum ka paralok na ka bynta ka Shillong Cherry Blossom. Kum shi bynta jong kane ka jingthmu, yn thaw ia ka Japan Zone ka ban pyni ia ka jingpher bad ka kolshor kaba riewspah jong ka Japan.
