Shillong, Jymmang 18 : U Myntri Rangbah ka Jylla Conrad K Sangma, ula pynbna ban tei ia ka Handicraft Training Centre ha ka shnong kaba pawnam ha ki kam shna jingshna da ka kti bad kam thain jingthain-ka shnong Tangmang, kaba hap hapoh ka Pynursla Sub Division, East Khasi Hills.
U Myntri Rangbah ula leit iuhkjat ha ka shnong Tangmang ha ka sngi Saitjain, kaba dei ruh ka sien ba nyngong eh na ki Myntri Rangbah ka Jylla ban leit iuhkjat ha kane ka shnong.
Ka Tangmang kaba la long shnong la palat arspah snem, ka dei kaba la seng da ki briew kiba leit wad jaka rieh hadien ka jingkhynniuh u jumai bah.
Na ka jingbna nam ia ka jingitynnad ka sawdong sawkun, kaba dap ha ki kshaid bad ki wah kiba tuh sha rithor Bangladesh, ka Tangmang ka dei ruh ka shlem jong ka kam thain jingthain da ki siej bad ka kam thain jain.
Ha ka jingleit iuhkjat, ki paid Nongshongshnong kila pdiang sngewbha ia u Myntri Rangbah bad pyni ruh ia ki mar ba ki thain kti bad ki mar ba shna da ki siej khamtam ka shylliah ba thain hi.
Namar ka jingshoh biej ia ka jingtbit thain jingthain ha kane ka Shnong, u Myntri Rangbah ula bthah ia ki Ophisar ba kin thied ia bun bah ki mar jong kane ka Shnong ban ioh ai sngewbha ia ki Heh Sorkar ba nabar, kiba wan kai sha Jylla.
“Kane ka dei ka jingwan iuhkjat ka ban sah jingkynmaw” ula ong bad bynrap “Kum ka Sorkar, ngi ngeit b aka roi ka par ka dei ban long lang ia baroh-Haba ngi kynshew pisa ha ki jingtei ba heh, ngi dei ruh ban pyntreikam ia ki prokram bapher bapher ban kyntiew bei beit ia ka jingim ki nongshongshnong”.
Haba pynpaw ba ka Sorkar kala kut jingmut ban kyntiew ia ka ioh ka kot ha ki jaka nongkyndong lyngba ki kam bapher bapher, u Conrad ula ong “Ka jingkyrshan ia ki nongshna jingshna bad ki nongthain jingthain ki dei ki thong ba hakhmat eh jong ka Sorkar MDA. Lyngba ki skhim pynmyntoi bapher bapher, kynthup ka jingkyrshan ia ki Self Help Group (SHG) bad ki Village Organisation, ngi don jingmut ruh ban pynkupbir ia ki Nongshongshnong bad kyntiew ia ka lad kamai jakpoh”.
U Conrad ula pynbna ruh ban tei ia ka Handicraft Training Centre ha ka shnong Tangmang. Ka Centre kan kynthup ia ki jingtei ka juk ba mynta, ki kor ki bor bad ki jaka sah ia ki nongwan shah hikai ba kin ioh jinghikai na ki stad shna jingshna bad thain jingthain ha ka Shnong.
Ula pynshlur ruh ia ki trai shnong ba kin nang pynbun ia ka jingpynmih mar, pynjanai ia ki mar ba ki pynmih bad ban wad ia ki iew shabar jong ka Jylla Meghalaya ba kin nang kham paw.
Ha kane ka jingleit iuhkjat, u Myntri Rangbah ula pynlong ruh ia ka CM-Connect, bad iakren markhmat bad ki nongshong shnong haba sngap ruh ia ki jingsngewkhia bad ki jingeh ba ki don.
Haba jubab ia ka jingkyrpad na uwei u samla pule, u Conrad ula kular ba un sa mang pisa noh na ka Chief Minister Special Development Fund ban tei ia ka building ba thymmai jong ka Tangmang Secondary School.
