Shillong, Risaw 15: U Myntri Rangbah ka jylla Conrad K Sangma hynne ka sngi ula pynbna baka sorkar kala mang palat T.11 klur naka bynta ban kynthup iaka shnong Lawsohtun ban ioh um bam lyngba ka skhim Jal Jeevan Mission (JJM).
Haba kren ha ka jingialang bala long hapoh ka shnong Lawsohtun, u Conrad ula iathuh ba ha ki snem mynshwa kiwei ki jylla ka ri India bad ka sorkar pdeng ki ju ialap khana ba ki don tang 4600 tylli ki longïng haki thain nongkyndong jong ka jylla Meghalaya kiba ioh um ha man ki tyllong ïng.
U Conrad ula kam ba hadien ba ka jingwan synshar ka sorkar Meghalaya Democratic Alliance (MDA), ki tnat treikam sorkar bapher bapher kila sdang ban trei bha bad dei namar kane ka jylla Meghalaya mynta ka kynti kala paw bha ha bun ki bynta kum haka tnat ka koit ka khiah, ka kam jngohkai pyrthei bad mynta haba iadei bad ka jinglah bha ban pyntrei iaka skhim JJM.
“Hapoh saw snem shiteng ka sorkar Meghalaya kala lah ban wanrah ka jingkylla ha ki bun bynta bad dang shen haka 2 tarik ka president ka ri India kala pynkupburom iaka jylla kum ka jylla kaba lah bha ban pyntreikam iaka skhim JJM hapoh ka jylla” la ong u Conrad.
U Conrad ula ong ba naka liang ka sorkar jylla kala iakren bad ka sorkar pdeng khamtam iaka tnat Ministry of Jal Shakti naka bynta ban kynthup lang iaki shnong kiba khap sor lane kiba hap hapoh ka thup Census Town hapoh ka skhim JJM naka bynta ban pynthikna ba ki longing kidei ban ioh um bam.
Ula ong ba ka jingiakren bad ka jingshim khia ka tnat PHE kila don bun tylli ki shnong kiba hap ha khap sor kila shah kynthup hapoh ka skhim JJM bad kawei na kine ki shnong kadei ka Lawsohtun bad naka liang ka tnat kala mang palat T.11 klur ban pyntrei iaka skhim JJM hapoh ka thain.
Naka liang u MLA ka thain bah Hamletson Dohliong u badei ruh u myntri ka tnat CRD Block ula ong ruh ba watla ka shnong ka kham biang haba iadei bad ki kam pynroi, ka shnong ka donkam pisa naka bynta ban pynpoi umbam sha man la ki tyllong ïng kiba don palat iaka 2000 tylli ki longing.
U bah Hamlet ula iathuh ba ula iakren bad ka sorkar bad dei namar kane ba ka sorkar ruh kala sngap iaka jingkren jong u bad kala mang palat T. 11 klur ban pyntrei iaka skhim JJM hapoh Lawsohtun kum shi bynta ban pynthikna ba ki longing jong ka thain ki ioh umbam ha ki sngi ban wan.
“Kum u MLA ka thain nga la ialeh katba lah ban pynioh iaka umbam hapoh ka thain khamtam ha Block I bad Block II bad mynta ka kynti ka thain Lawsohtun kaka shah kynthup hapoh ka skhim JJM” la ong u bah Hamlet.
