Shillong, Naialr 04: u Myntri rangbah ka jylla u Conrad K Sangma hynne ka sngi ula pynbna ban bei haduh T.50 hajar iaki Nurse ki ban ioh shah hikai pyntbit naka bynta ban iohkam kum ki Nurse sha kiwei pat ri jong ka pyrthei.
Ia kane u Conrad ula pynbna haka jingialang ‘Overseas Nurse Job Fair’ ha Shillong ban pynrung kyrteng iaki Nurse kiba kwah ban shah hikai pyntbit naka bynta ban ioh kam kum ki Nurse sha kiwei pat ki ri jong ka pyrthei.
Haba kren sha ki lad pathai khubor u Conrad ula ong “Donkam ban ai khublei iaka Myntri ka tnat ka koit ka khiah kong Ampareen Lyngdoh bad ia baroh ki ophisar ka tnat kiba trei shitom ban pynurlong ia kane ka rynsan ‘Overseas Nurse Job Fair’ naka bynta ban prat lynti iaki Nurse kiba kwah ban shah hikai pyntbit shuh shuh khnang ban ioh sha kiwei pat ki ri”.
U Conrad ula ong ba ka jylla ka don shi bun ki Nurse kiba la tbit lypa hala ki kam bad kiba la tbit ruh ban trei sha kiwei pat ki ri hynrei ka jylla tad haduh mynta ka dang duna ka lynti kumno ban ialam iaki Nurse napoh kane ka jylla sha kiwei pat ki Ri.
“Kane ka ‘Overseas Nurse Job Fair’ kadei ka lynti naka bynta ki Nurse jong ka jylla kiba kwah ban trei sha kiwei pat ki ri bad kum shi bynta ban pynshlur iala ki Nurse, ka sorkar jylla kala rai ban iarap pisa mar T.50 hajar ban bei iaka bai shah hikai pyntbit” la ong u Conrad.
Haba kylli haduh katno ka sorkar kan mang tyngka man u snem, u Conrad ula ong “Kane ka dang dei ka jingpyrshang ba naka liang ka sorkar ka long kaba la kloi ban iarap pisa bad lada khien kyllum mar T.50 hajar, haka shi snem, ka lah ban poi haduh T.2.5 klur tang naka bynta 500 ngut ki Nurse”.
Nalor kane u Conrad ula pyntip ruh ba shen ka tnat ka koit ka khiah kan pynlong iaka ‘Overseas Nurse Job Fair’ shapoh ka thain Garo Hills naka bynta ban prat lynti iaki Nurse na kane ka thain ban poi sha ki jaka hikai pyntbit khnang ba kin ioh kam sha kiwei pat ki Ri.
As a Govt. we will leave no stone unturned to ensure support to as many nurses as possible and therefore, we encourage the future caregivers gathered to stay committed to their dreams and ensure they see it through despite the challenges they may face outside the state and the… pic.twitter.com/3EFUHQ2tS3
— Conrad K Sangma (@SangmaConrad) August 4, 2023
