Shillong, Nailar 04 : U Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong ha ka sngi Thohdieng ula buh jingkylli halor ka jingmut ha lyndet ka jingpyrshah ia ka rai ka Sorkar ban ai jaka ha kaban pynkynriah ia ka Anjalee Petrol Pump na ka bynta ban shna ia ka flyover ka ban weng ia ka jingdheng kali ha Shillong.
“Hato phim pyrkhat ba ka jingpynkynriah ia ka petrol pump na Anjalee ka kham kongsan ban ia kiwei kiwei. Ngi la iohi ia ki briew kila syllang shaba palat ha kane ka lynti na Umshyrpi shaduh 7mile bad Banium ha kaba kala shimpor haduh 2-3 kynta ba kin poi na 7 mile sha Shillong” ong u Bah Prestone haba iakren bad ki nongthoh khubor.
Kane ka jingkynthoh kala mih tang shisngi hadien ba ka seng FKJGP-Upper Shillong Circle kala pynpaw ia ka jingpyrshah kaba jur halor ka jingthmu jongka Sorkar ban ai ia ka jaka jong ka Animal Husbandry ha Upper Shillong na ka bynta ban buh ia ka Anjalee Petrol Pump.
Kat kum ka jingong jong u, ki Sengbhalang ne mano mano ruh ki dei ban ieh ha ka jingstad jong ka Sorkar ia kum kane ka kam.
U Bah Prestone ula kam ruh ba ka Sorkar Jylla ha ka jingshisha kala pyrkhat bha haba shim ia ka rai da kaba kyrpad ruh ia ki trai ka petrol pump ban kynriah noh na kane ka jaka ba don mynta namar ka jaka ban pynnoh ia ka flyover kan long ha katei ka jaka.
“Lada ngim ioh ia katei ka jaka jong ka petrol pump, kan long kaba eh ban ailain surok bad ia ka jingtei jong ka flyover ruh kumjuh, Namar kata, ka Sorkar kala rai ba kan ithuh kumba 12,000 lane 13,000 sqfeet ka jaka na ka bynta ban pynkynriah ia ka petrol pump sha Upper Shillong. Ngi donkam palat ba ngi dang don bun ka jaka na ka tnad Animal Husbandry, kaba long ym duna ia ka 60 acre bad 13,000 sqft kam long eiei satia hakhmat ka jingdon ia kat kane ka jaka” ula ong.
Halor ka nongrim jong ka FKJGP ba ka jingai jaka ia ka petrol pump kaba dei ka kam shimet, kan pynpulom noh ia ka jing thmu jong ka Tnad ban buh ia ka dairy bad kiwei kiwei ki kam ri jingri, u Symbud Myntri Rangbah ula ong “Wat na ka Sorkar Jylla, ka Sorkar Pdeng, ngi shim jaka na ki riew shimet, kaei ka jingma ia kane?. La ka dei ka jaka Sorkar ne jaka shimet, nga sngew ba ka jingeh kam mih satia”.
“Kaba kongsan hi ka long ba ngi hap ban sngewthuh ba ka Shillong ka dei ka Nongbah jong ka Meghalaya bad katei ka jaka la ka dei kaba 4000 lane 5000 sqft ka lah ban shakri shikatdei eh ia ka Jylla. Kaei ka jingktah ban iabuji ia katei ka jaka kaba kongsan eh da kaba ai 13000 sqft shabar ka nongbah Shillong bad khamtam eh shabar jong ka flyover ka ban pynshna da ka NHIDCL” bynrap u Bah Prestone.
Haba kylli, ula ong “Wat kylli ia kum kane ka jingkylli. Phi ieh ha ngi bad kumno ban leh kan shong ha ngi”.
Pule lang ia kane: Pyrshah jur ka FKJGP ba thmu pynkynriah ia ka Anjalee Petrol Pump sha Upper Shillong
