Yn kner jingiarap sa ia ki Nongsengkam, Nongialehkai bad ki Nongshna phlim
Shillong, Naitung 03 : U Myntri Rangbah ka Jylla Conrad K Sangma hynne ka sngi Nyngkong, ula pynbna ba ka Sorkar Jylla kan aiti noh sha ka Tnad Sports & Youth Affairs ba kan pyntreikam ia ka Youth Engagement Through Empowered Youth Organisations (Yess) Meghalaya, kaba ju pyntreikam da ka Chief Minister Secretariat.
U Myntri Rangbah ula pynbna ia kane haba iashimbynta ha ka jingrakhe ia ka jingdap shisnem pura ka jingtreikam jong ka YESS Meghalaya ba long hynne ka sngi ha Banquet Hall, Pinewood Hotel.
Ha u Naitung 2022, ka Sorkar kala pyllait paidbah ia ka skhim Youth Engagement Through Empowered Youth Organisations (Yess) kaba dei ka flagship programme ban ai jingiarap ia ki seng jong ki samla hapoh ka Jylla. Ha kane ka shisnem, ka Sorkar kala pyllait haduh T. 4.5 klur sha kumba 1300 tylli ki seng jong ki samla.
Haba kren ha ka jingialang, u Myntri Rangbah ula ong ba ka don ka jingbym biang kaba bun bha haba phai sha ki kam ba ki samla ki kwah ban leh bad ka jingkyrshan ba ki ioh ban pyntreikam ia kine ki kam ba ki thmu ban leh.
“Namar kata, kila don bun ki seng ki samla bad ki kynhun kiba leh ia shibun ki kam dalade khlem ka jingkyrshan nangno nangno ruh hynrei kila leh ia kine ki kam namar ka jingieid ia ki” ula ong haba bynrap “Kam don satia ka rukom pynbeit ba ryntih halor ka jingai jingiarap song pisa sha ki da ka Sorkar lane da ki Tnad sorkar”.
U Myntri Rangbah u ong ba ka Sorkar Jylla ka dang pynkhreh ia ki plan ba janai khnang ban lah ai ia ki song jingiarap pisa sha ki seng ki samla ba kin trei ia ki kam ba ki kwah.
Ula ong ruh ba ka YESS Meghalaya prokram kaba dang pyntrei haduh mynta lyngba ka Chief Minister Secretariat, yn sa aiti noh sha ka Tnad Sports & Youth Affairs.
We understand that the positive energy of the youth needs to be channelised and through Yess Meghalaya, the youth were given the opportunity to pursue their passion to make a difference.
In the last one year, through financial assistance that was made available, the youth…
— Conrad K Sangma (@SangmaConrad) July 3, 2023
Ula pyntip ruh ba kin sa don kiwei ki prokram na ka bynta ki nongsengkam, ki nongput nongtem, ki nongialehkai bad ki nongshna phlim ba kin pyni pyrthei ia ki kam jong ki bad ki jingjop ba ki ioh khnang ba kiwei ki samla kin ioh mynsiem lang.
“Ka long kaba kongsan ban ai mynsiem bad kyntur ia ki samla bad ban pyni pyrthei ia ka sap, kumta ki prokram kiban sa pyllait ha kine ki khyndiat sngi ban wan, kin ai ka rynsan ia ki ban sei la ka sap” ula ong.
“Ka YESS Meghalaya ka dei kawei na ki prokram kaba la treikam bha bad ngi ki samla ruh kila wan shakhmat bha ban shim ia ka prokram. Nga kyrpad ia bun ki samla ba kin wan shakhmat bad register ialade khnang b aka Sorkar kan lah ban ai jingkyrshan ia ki” ula ong.
U Myntri Rangbah ula pyllait paidbah ruh ia ki kyndon ba thymmai jong ka YESS Meghalaya bad ula sam ruh ia ki cheque sha ki nongioh ia ka YESS Meghalaya.
Kiba la iadonlang ha kane ka sngi ki kynthup ia u Myntri kam ialehkai Bah Shakliar Warjri, Commissioner & Secretary ka Tnad Sports & Youth Affairs Dr Vijay Kumar D bad Director ka Sports & Youth Affairs Kong Isawanda Laloo.
Pule lang ia kane: Manipur: Pyllait ki Kuki ia 5 ngut ki samla Meitei ban phah ia ka khubor ka jingiasuk
