Shillong, Lber 18 : U Myntri Rangbah ka Jylla, Conrad K Sangma ula pynbna ba ki Pulit ka Karnataka, kila kem ia lai ngut ki briew halor ka jingngat bih ki khynnah skul ha Malavalli , kaba lam sha ka jingiap ki arngut ki heprit na Meghalaya.
Kat kum ka khubor, ki arngut kiba shah kem ki dei u trai jong ka Residential School, u cook bad u warden jong ka hostel kaba pyniaid beain da kane ka skul.
U Myntri Rangbah ula pynthikna ia kane ka jingshah kem ha ka sngi Ba-ar lyngba ka jingthoh ha X. Ula pyntip ruh ba u Commissioner & Secretary (Home) Bah Cyril Diengdoh lem bad kiwei ki heh Sorkar, kila don ha Karnataka ban iarap ia kine ki heprit bad ki kmie kpa nalor ban iakren ia ki bor pyniaid district.
Ki arngut ki khynnah skul na Meghalaya kiba iap ki dei kiba la tip kyrteng u heprit Khrehlang Khongtani, uba dang pule klas VI bad uwei pat u dei uba tip kyrteng da u Namebantei Marwein ba 12 snem, ba dang pule klas VII,uba dei na ka shnong Sohparu, kaba jngai tang katno katne kilometer na Nongstoin.
Kine baroh arngut ki dei napdeng ki 23 ngut ki khynnah skulk a Meghalaya kiba sah ha kane ka hostel ba jia kane ka jingjia ba sngewsih.
Hadien ka jingkem pang ba ngat bih, kine baroh ki khynnah ba pang la pynkit noh sha hospital da ki bor pyniaid district.
Ka Sorkar Jylla kala pynbna ia ka song jingiarap ba mar T.3 lak sha ki longiing jong kine ki heprit ba khlad bad kular ruh ban kyrshan ia ka bailut baisep jong kiba dang don hapdeng ka jingsumar.
U Myntri Rangbah ula bynrap ruh ba ka Sorkar kala pyrshang katba lah ban wanrah biang noh ia kine ki khynnah skul sha Meghalaya.
