Shillong, Jymmang 19: U president ka Voice of the People’s Party (VPP) u bah Ardent Miller Basaiawmoit hynne ka sngi ula pynbna ban sdang daka jingshah thngan khlem buh por hakhmat ka khyrdop Secretariat naduh ka 23 tarik mynta u bnai.
Ia kane u bah Ardent Miller Basaiawmoit u badei ruh u MLA ka Nongkrem ula pynbna kum shi bynta ban pyrshah iaka jingkyntait ka sorkar jylla ban iathir ban pynbeit shwa iaka bhah thungkam lane ka Reservation Policy.
U bah Ardent ula kren hadien ba ki nongialam ka VPP kila mih jyndat noh naka jingialang ki sengsain pyrthei bala khot daka sorkar jylla ban iakren halor ka jingpyntreikam iaka Roster System.
Pule lang ia kane: Mih jyndat ka VPP na ka jingialang ki Seng Sain Pyrthei
Haba kren haka jingialang ha jaka ieng kali ka Additional Secretariat u bah Ardent ula pyntip ba ka jingmih jyndat jong ki 3 ngut ki Nongialam naka jingialang ki sengsain pyrthei bala khot daka sorkar Meghalaya Democratic Alliance (MDA 2.0) kadei namar ba ki nongialam ka VPP ki skhkem haka nongrim jong ka Party kata ban iatai ban pynbeit noh shwa iaka Reservation Policy.
“Ka VPP kan nym kynrdan dien, ka sorkar jylla bad kiwei ki sengsain pyrthei kim nud ban iakren halor ka Reservation Policy namar lada iakren, yn lap shai iaka jingleh buit tuh jong ka sorkar MDA 1 bad ka sorkar MDA 2.0 lyngba ka Office Memorandum bala pynmih ha u snem 2022 kaba la pynkylla iaka Reservation Policy ban pynduhnoh iaki samla Khasi-Jaintia” la kynnoh u bah Ardent.
U bah Ardent ula ong ba ka VPP bad ki paidbah ka jylla khamtam na Rilum Khasi-Jaintia ka pynrem jur ia kane ka jingle arsap bad ka jingmynthi ka sorkar jylla ban iakren bad ban iathir kumno halor ka jingdonkam ban bishar bniah iaka bhah thung.
“Ngim lah ban shu sngap baka sorkar kan shu leh katba mon, ki nongialam ka VPP kila shim iaka rai ba u President ka VPP marwei shwa un sdang iaka jingiakhih shah thngan khlem buh por naduh ka 23 tarik Jymmang ha khmat ka Secretariat ban pynpaw ia ka jingpyrshah ia ka jingkyntait ka sorkar jylla ban iathir ban pynbeit shwa ia ka bhah thungkam thung lane ka Reservation Policy” ula ong.
U bah Ardent ula kyntu iaki paidbah ban kyrshan iaka jingiakhih halor ka Reservation Policy daka ba pynthut iaki MLA ha man ki konstitwensi bad kidei ban leit tur bad ban leit shong sha ki jaka sah jong man ki MLA kiba kuman bad ki bym sngewthuh ia kane ka jingiakhih kaba myntoi iaki khun samla ka Rilum Khasi-Jaintia.
Nalor kane u bah Ardent ula kynnoh ruh baka jingshah shoh u samla Khasi ubadei ruh u nong niah kali kamai ha Khyndai Lad ruh kadei ka buit poh jong ka sorkar jylla ban ialam bakla iaki paidbah sha kawei pat ka jingkulmar khnang ba kin klet noh ia kane ka jingiakhih ban bishar bniah shwa iaka Reservation Policy.
