Shillong, Jylliew 01 : U President ka Voice of the People Party (VPP) bah Ardent M Basaiawmoit hynne ka sngi Palei ula pynbna ba ula pynsangeh noh iala jingshah jingit kaba ka iaid haduh 10 sngi, hadien ba ka sorkar jylla kala pynmih ia ka jingpynbna paidbah ba kala thaw iaka Expert Committee ban bishar thymmai ia ka Reservation Policy.
U Bah Ardent ula ong, kadei kane kaba ka VPP kala dawa bad ka VPP kala buh ia kane ka mat ha ka mat elekshon bad ka seng kala buddien katba kiwei pat kim sngewnud ban leh eiei.
U Bah Ardent ula pynpaw ka jingsngewnguh ia ki nongialam ka party kiba la leit mihkhmat sha ka Committee kiba la pynbor ia ka sorkar ban thaw iaka Expert Commitee.
“Kumba nga la kular ia phi ki paidbah, nga la pyndep ia ka jingkular ba ngan ym mih na kane ka jaka katba ym pat mih ka notification da ka Sorkar” ula ong.
Ula ong ba ka sorkar kala kohnguh ba dei ban pynbeit thymmai iaka Reservation hynrei ka VPP kan nang buddien ba ka jingthungkam thungjam da ka sorkar kam dei shuh ban iaid kynriang ha kaba tang ki briew kiba don jingithuh ne don jingiajan kin shah thungkam.
Une u Nongialam ka VPP ula bam ia ka ja hynne ka sngi, kaba la pyntian da ka Kurim kum ka dak ka jingpynsangeh noh ia ka jingshah thngan kaba la iaid 10 sngi.
