Shillong, K’Lyngkot 17: Ka Liangpyrshah Voice of the People’s Party (VPP) kala pynbna ban pynlong iaka jingiakhih daka ba shong kyllain mongor naduh ka 19 tarik mynta u bnai namar ka jingshah weng kam ki Ophisar ka Lokayukta.
Kane ka jingiakhih daka ba shong kyllain mongor kan long hakhmat ka Secretariat naduh ka por 10 baje mynstep haduh 4:30 janmiet bad kane ka jingiakhih kan iai bteng beit man ka sngi.
Ka VPP kala rai ban pynlong ia kane ka jingiakhih ban pyrshah iaka Sorkar Jylla kaba la weng ki 3 ngut ki ophisar jong ka Meghalaya Lokayukta kiba tohkit iaki bam bamsap.
Haba iadei bad kane ka jingiakhih, ka VPP ka kyntu ia baroh kiba thmu ban wan shim bynta ba kim dei ban shim iaka ain ha kti lane ban pynthud iaka shong suk shong shngain hapoh ka nongbah Shillong.
