Gangtok, K’lyngkot 22: Lehse kan dei ka khubor kaba sngewtynnad na ka bynta ki paidbah nongshong shnong ka Sikkim hadien ba ka sorkar jylla ka la shim ia ka rai ban aijingiarap ha ka liang ka sumar sukher na ka bynta longkmie kiba trei ha ki kam sorkar kiba ioh khunrit baroh shi snem ia kaba yn pynlut pynsep da ka sorkar jylla.
Ban kyntiew ia ka jingdon jong ki longkmie kiba ioh khunlung hapoh Sikkim, na ka liang ka sorkar ba la ialam da u myntri rangbah ka jylla u Prem Singh Tamang ka la shim ia kane ka sienjam ban pyntreikam nangne shakhmat.
Ha kane ka sngi Palei ba la lah u CM ka Sikkim u Prem Singh Tamang u la pynbna halor ki lad jingiarap kiba iadei ha ka liang ka jingri jingsumar khunlung na ka bynta ki nongtrei sorkar kiba dei ki kynthei ha ka jylla ka ban long nalor ka shi snem jong ka jingai shuti ia ki longkmie kiba dang ioh khunlung.
Haba kren sha ki lad pathai khubor, u CM Tamang u la ong, “Na ka liang ka sorkar kan aijingiarap ha kaba iadei bad ki jinglut jingsep na ka bynta ki nong ri nongsumar na ka bynta ki khunlung jong kito ki longkmie kiba dang ioh khunlung bad kiba dei ki nongtreikam sorkar na ka bynta shi snem kynthih khnang ban pynlah ia ki longkmie kiba trei ba kin wanphai sha la ki jong ki kam ki jam hadien ka shuti ioh khunlung kaba shi snem kynthih.”
