Naduh T. 75 lak haduh T. 5000 yn ai ia kiba khur takma
Shillong, Naitung 22: Ka Sorkar Meghalaya Democratic Alliance (MDA) lyngba ka Tnad Sports & Youth Affairs ka Jylla, kala pynbna ban ai noh da ki khusnam ba dei da ka song pisa sha baroh ki samla ialehkai bad ki Coach ka Jylla, kiba leit iashimbynta ha ki 19 tylli ki jait lympung ialehkai bala ithuh da ki Synjuk ialehkai bapher bapher ka Ri bad ka pyrthei baroh kawei.
Kat kum kane ka jingpynbna, ka song pisa ka long ym tang sha kiba ioh khur ia ki takma na kine ki lympung hynrei wat ia ka jingshah jied ban leit iashimbynta ha kine ki lympung.
Ka khusnam ka dei kaba la pynshongdor kat kum ki jait lympung bad ki takma kaba ioh ban khur kata ka takma ksiar, takma rupa bad takma rnong.
Kat kum ka jingpynbna ka Tnad Sports & Youth Affairs, kane ka jingai khusnam song pisa ka dei jong ka skhim “Cash Award Scheme” haba pyntreikam ia ka Sports Policy bala pynbna paidbah (notify) ha u snem 2019, kaba dei ka jingkut jingmut jong ka Sorkar ban wanrah shibun kiei kiei na ka bynta ban kyntiew ia ka kam ialehkai hapoh ka Jylla bad ban iarap song pisa ia ki samla ialehkai.
Ka Tnad Sport kala pyntip ba kane ka skhim kan sdang treikam naduh u snem 2017 kaba mut ba ka jingai khusnam kan long tang ia ki samla ialehkai bad ki Coach kiba wanrah nam ia ka Jylla naduh u snem 2017.
Ka Tnad ka pyntip ba kane ka skhim ka treikam tang ia kiba iashimbynta ha ki 19 jait ki lympung ialehkai kiba la ithuh da ka International Olympic Association (IOA), ka International Non-Olympic Committee (INOC), International Para Olympic Committee(IPOC) , ka Olympic Council of Asia (OCA), World Chess Federation (WCF), International Sports Committee for the Deaf (ISCD), International Blind Sports Federation (IBSF) lane Special Olympic Internationl.
Ia ka lympung ialehkai National ( National Competition) la ong ba ka lympung ka dei ban pynlong da ka National Sports Federation bala ithuh da ka Ministry of Youth Affairs & Sports ka sorkar India bad ki Association jong ki Jylla kiba la iasoh bad ka NSF.
Na kine ki 19 tylli ki lympung, 11 tylli ki dei jong ki International Tournament kiba kynthup ia ka Olympic/para olympic, Asian Games/Para Asian Games, Commonwealth/Para Commonwealth Games, World Cups, World Cup-Non Olympic Sports, Youth Olympics/ Youth Para Olympics, Youth Asian Games/ Youth Para Asian Games, Youth Commonwealth, Youth Worldcup/ Youth World Cup-Non Olympics Sports, Asian/Regional International Tournament-Non Olympics Sports.
San tylli pat ki dei jong ki National Tournament ne ki lympung ialehkai hapoh ka Ri kiba kynthup ia ka National Games/ Para National Games, National Championship/para National Championship, Khelo India Games, School Games Federation of India/Par National School Games bad ka All India Inter University Championship.
Ka jingai khusnam kan long ruh ia ki lympung State & Regional kiba kynthup ia ka Zonal Inter State Tournament/Championship, Regional Interstate Tournament/ Invitation Multi State Tournament, bad ka State Level Tournament & Championship bala ithuh da ki synjuk ialehkai bapher bapher ka Jylla.
Ka Khusnam pisa kaba heh duh ka dei T. 75 lak ia kiba ioh takma ksiar ha ka Olympic bad kiba ioh iashimbynta ki ioh haduh T. 5 lak. Ka khusnam kaba rit duh ka dei ka State Level Tournament & Championship ha kaba kiba ioh takma ka long T. 15000 ia kiba ioh takma ksiar, T. 10000 ia kiba ioh takma rupa bad T.5000 ia kiba ioh takma rynnong.
Hynrei kala kren shai pat ba kane ka jingai khusnam kan long beit thik tang ia ki samla ialehkai bad ki coach kiba dei ki Nongshongshnong ka Jylla bad kiba dang iadonbynta ha ki jingialehkai haduh ka por ba ki applai ban ioh ia ka khusnam, La ong ba kane ka skhim kan yjm treikam satia ia kito kiba ialehkai na kiwei pat ki Jylla lait na ka Jylla Meghalaya.
Ka Tnad ka khot ia ki samla ialehkai bad ki coach kiba lah ban ioh ia ki khusnam, ki lah ban applai da kaba thep da ka phorm ha ki Ophis jong ki District Sports Officer.
Ka Tnad kala bthah ruh ia ki Synjuk ialehkai bapher bapher ba ki dei ban ai jingtip sha ka tnad ia ka thup kyrteng jong baroh ki samla ialehkai ba ioh khur takma manla ka lai bnai khnang ba ka Tnad kan ioh ban pynshisha bad ban ai ia ki khusnam.
