Shillong, Nailar 29 : U Commissioner & Secretary ka Tnad Bording Sanjay Goyal ula pynbna ba ka jingshna ia ka sub-station ba 132KV kan sa sdang noh shen ban pynthikna ia ka jingpynbiang ia ka jingsam bording ha Ri-Bhoi District.
U Goyal ula iathuh ha ki nongthoh khubor ha ka sngi Thohdieng ba ki jingeh bala iakynduh da ka District kam dei satia na ka jingduna bording, hynrei ka dei ka jingeh na ka jingtan lain namar u lain transmission u jrong haduh 40 km naduh Umiam haduh Nongpoh.
Ula pynpaw ia ka jingsngewnguh ia u Myntri Rangbah bad ia ka Tnad ba ki sngewthuh ia ka jingeh bad kila ai jingmynjur ia ka project.
“Ngi la mang ia ka sub station ba 132 KV ka ban lam sha ka jingsam bording ka bym thut shuh ha ka District hadien ki jingeh kiba mih baroh shikatta. Nga sngewnguh bad ka Tnad bad ia u Myntri Rangbah ki sngewthuh ia ka jingeh bad ngin sa sdang noh shen ban shna ia kane ka sub station” ula ong.
Haba iadei bad ki bill bai bording ba dang sahteng, u Goyal ula ong baka jinglum ia ka bai bording na ki nongthang bording ka dang dei ka jingeh. Hynrei, ka Tnad ka dang wad ia ki lad ki lynti ban pynjanai ia ka rukom lum bad kala pyntreikam ia ka jingsiew online, kynthup ka Google Pay.
Ula kyntu ia ki nongthang bording ba kin siew tista ia ki bill, haba ban jur ba ka jingsiew ha ka por kaba biang ka long kaba donkam ban lah pynbiang ia ka jingsam bording.
Nalor kane, u Goyal ula pynbna ruh ba ka Tnad ka don jingthmu ban ai song pisa sha ki nongthang bording kiba siew tista ia ki bill lyngba ki kor online.
U Goyal ula pynbna ruh ba ka Tnad kan sa pynthymmai ia ka skhim ban nym khein shuh ia ki surcharge jong ki bill bym pynslem ban siew.
