Shillong, Risaw 31 : Ka Sorkar Jylla kala pynbna ba kan pynsdang noh ia ka jingai jinghikai ia ki Khynnah Kynthei ba kin nang iada ialade (self-defence training programs) ha baroh ki skul kiba don ha jaka nongkyndong bad jaka sor jong ka Jylla.
Haba pyntip ia kane ha ka sngi Thohdieng, u Nongaibuit ka Tnad Social Welfare Bah Paul Lyngdoh ula ong “Yn sa pynsdang noh ia ka self-defence training program ia ki khynnah kynthei ha ki skul ha ki jaka nongkyndong bad jaka sor ha ka dur jong ka mishon bad kan don ka jingiatreilang hapdeng ka Tnad Pulit bad ka Tnad Sports & Youth Affairs”.
Ula pynbna ruh ba ka Sorkar kan wanrah ruh ia sawtylli ki working women hostel ha Shillong, Jowai, Ri-Bhoi bad Tura. Ka jingthmu jong kine ki hostel ka long ban ai ia ka jingsngew shngain bad ka jingkyrshan ia ki kynthei bala trei la ktah.
Ka Tnad kala pyntreikam ruh ia ka helpline nombor ba treikam 24 kynta shisngi-181, na ka bynta ki kynthei kiba shah thombor hala iing la sem bad kiwei kiwei.
Ka Sorkar kan kyntiew kyrdan bad pynshna ruh ia ki painkhana ha ki skul ha ryngkat ka jingiatreilang bad ka DRDA bad ka Tnad Pule Puthi.
Une u Nongaibuit ula pynbna ruh ba ka Sorkar kan sa sam manla ka por ia ki sanitary pad ba shna hi ha Jylla sha ki samla kynthei ba dang khie dang san ha ki skul, haba pynleit jingmut bha sha ki jaka nongkyndong.
