Shillong, Naiwieng 26: Ka Sorkar Meghalaya kala thied ia ka jaka ha Jongsha ban pyntrei ia ka projek lyngba ka Public-Private Partnership (PPP), ban tei ia ki jingtei kam jngohkai kynthup ka 5 Star Hotel bad Resort.
“Ia katei ka jaka lah dep ban thied, ka Sorkar kala mynjur ban pyniaid shakhmat bad ki kam ki jam bad ia ki kyndon la dep ban pyniaid ha kata ka rukom, ha kaba la khot ruh ia ka Expression of Interest (EoI), la thaw ia ka committee bad da kaba pynshong nongrim ia katei ka jingiasyllok bad jingiakren, ia ka jingtyrwa kaba pura la wanrah hakhmatjong ka Kynhun Myntri kaba la ai jingmynjur hynne ka sngi” ong u Myntri Rangbah ka Jylla u Conrad K Sangma haba iakren bad ki nongthoh khubor hadien ba wai ka jingialang jong ka Kynhun Myntri hynne ka sngi Balang.
Ula ong, ba ka sorkar ka dang ithuh ia ki jaka kiba kongsan ha kaba iadei bad ka jingpynroi ia ka kam jngohkai kum ha Jongsha, Laitlum, Nongjrong bad Syntung, na ka byta ban pyntreikam ia ki projek kam jngohkai ba kynthup ia ki hotel kiba remdor da kaba tei lyngba ka Private-Public Partnership.
“Ngi lah pyndonkam ia kiba bun ki jaka sorkar” ula ong haba bynrap, “Ngi ngeit skhem ba ka long kaba donkam ban don ia ka Resort kaba bha bad ka 5 Star Hotel ha katei ka thain bad ka long ruh kaba donkam ia ka sorkar ban thied ia ka jaka (ha Jongsha),” ong u Sangma.
Nalor kane, ka sorkar kala mynjur ruh ban thied ia ka jaka ha Umden, ban kyntiew ia kane ka jaka ha ka kam jngohkai bad ban bhah T.50 Klur na ka bynta ban shna ia ki surok ha Nongpoh.
“Ngi lah mynjur ruh ban thied ia ka jaka ha thain Umden, kaban long kum ka jingkyntiew ha ka kam jngohkai. Ngi lah bhah T.50 Klur ban shna ia ka surok na Umden sha Nongpoh bad ka Umden kadei ka shnong kaba pawnam bha ha ka jingpynmih ia ki jain Ryndia, ha kaba bun bha ki nongjngohkai ki leit sha katei ka shnong bad kala don ruh ka jingdawa kaba jur na ki paitbah, ba ka sorkar kadei ban buh ia ka jaka jngohkai ha katei ka thain, ki jaka ban shong ban sah bad ban ialeh ban pynhun ia kane, ngi lah iaid shakhmat bad mynjur katkum ka jingtyrwa kaba la ai da ka tnad, ba ka sorkar kadei ban thied ia ka jaka hangtei” la ong u Conrad Sangma.
Ka Kynhun Myntri kala mynjur ruh ia ka Service Rules jongka Tnad Meghalaya Sports and Youth Affairs.
“Kane ka Tnad kam shim la don ia kano kano ka Service Rules haduh mynta bad khatduh ngi lah pyndep ia kane mynta ka sngi bad ka Service Rules kan long thik kum ka jong kiwei pat ki Tnad” bynrap u Sangma.
, ban tei ia ki jingtei kam jngohkai kynthup ka 5 Star Hotel bad Resort.){kind=link}