Shillong, Rymphang 16 : Ka Sorkar Jylla ha ka sngi Nyngkong, kala pynbna ban pynlong ia ka elekshon sha ka Iingdorbar ka Garo Hills Autonomous District Council (GHADC) ha ka 10 tarik Iaiong.
Ia kane la pyntip da u Myntri Sorkar Bah Wailadmiki Shylla hadien ka jingialang jong ka Kynhun Myntri bala pyniaid da u Myntri Rangbah ka Jylla Conrad K Sangma.
“Ka sngi ban iathep vote kan dei ha ka 10 tarik Iaiong katba ka sngi ban niew ia ki vote kan dei ha ka 14 tarik Iaiong” ong u Bah Wailad haba iakren bad ki nongthoh khubor.
U Myntri ula pyntip ba ka sngi ban pynmih ia ka jingpynbna paidbah kan long ha ka 9 tarik Lber katba ka sngi ba khatduh ban thep kyrteng ki kyrtong kan dei ha ka 16 tarik Lber.
Ka jingbishar kyrteng kan long ha ka 16 tarik Lber hadien ka por 3 aje janmiet bad ka sngi ba khatduh ban weng kyrteng kan dei ha ka 17 tarik Lber. Ka jingpynthikna kyrteng bad jingpynmih ia ki kyrteng kiba biang, ka jingai shap kan long ha ka 18 tarik Lber.
