Shillong, Risaw 17 : U Myntri Rangbah ka Jylla Conrad K Sangma ula pynbna ia ka plan ba ar bynta ban pynkhlain ia ki lad jingiada ha Meghalaya lyngba ka jingpyndait ia ki kor CCTV ha ki 48 tylli ki Shnong ha nongbah Shillong.
“48 tylli ki Shnong kila aiktien bad ka jingpyndait ia ki kor kala iaid ia kaba 7 tylli ki shnong kila dep bad sa 40 tylli yn dang pyndait ia ki waiar bad CCTV, ki ban sa treikam noh hapoh 60 sngi” ong u Conrad hadien ka jingpynlong ia ka jingialang bad ki Kynhun bapher bapher kynthup ki Rangbah Shnong, ki seng niam bad kiwei kiwei-ban kren ia ki lad ki lynti kumno ban nang pynkhlain ia ki lad jingiada bad jingshngain ki kynthei bad ki Khynnah ha Shillong bad ha ka Jylla baroh kawei.
Haba pyntip ba kan don arbynta ha ka jingpyntreikam, u Myntri Rangbah ula ong ba ka bynta ba nyngkong ka kynthup ia ka jingpyndait kor CCTV ha ki shnong ki thaw bad ban buh ia ka local command centre ka ban pyniaid hi da ki Rangbah Shnong bad ki Dorbar Shnong.
Ka Shillong Municipal Board kala ithuh ia 47 tylli ki Shnong ban pyndait ia ki kor CCTV ha kaba kawei kawei ka shnong kan ioh buh CCTV ha lai haduh san tylli ki jaka.
“Ka kam kala sdang bad hynniew tylli ki shnong kila dep bad sa 40 tylli yn sa lah pyndep noh hapoh u Naiwieng lane Nohprah” ula bynrap.
Ha ka bynta kaba ar, u Myntri Rangbah ula ong ba ia ki CCTV control room yn sa pyniasoh sha ka Integrated Command and Control Centre (ICCC) ha New Shillong.
