Shillong, Nailur 10 : U Symbud Myntri Rangbah Bah Prestone Tynsong ula pynbna ba ka Sorkar Jylla kan sa plie noh shen ia ka Meghalaya House ba thymmai ha Bangalore.
Kane ka rai kala mih haba jubab ia ki jingdawa kiba bun na ki paidbah kiba la kyrpad ban buh noh ia ka Meghalaya House ha kane ka sor.
Haba jubab ia ka cut motion ha Iingdorbar Thaw Ain ha ka sngi Balang, u Bah Prestone ula pyntip ruh ba un sa shong bishar kam halor ki jinglong jingman jong ki Meghalaya House ba don mynta bad bthah ia ki Ophisar ban pynthikna ba kin long kiba bha bad ba bit ba biang nadong hadong.
Haba iadei bad ki bill ba sahteng, u Symbud Myntri Rangbah ula kular ba ula buh jingthoh ia kane ka mat bad yn sa shimkhia ban pynthikna ba ki contractor kin ioh ia ki jingsiew man ka lai bnai.
