Shillong, Iaiong 11 : U Myntri Rangbah ka Jylla Conrad K Sangma ha ka sngi Saitjain, ula pynbna ba ka Sorkar kala pynkhreh ia ki kam ban buh ia ki iing ban ri ia ki riewtynmen ha kylleng ki jaka jong ka Jylla da ka jingthmu ba ki riew tynmen kin ioh ia ka jinglong tynmen kaba kmen bad ba smat ba sting.
“Nga angnud bha ban iohi ba kumno ba ngin lah ban don ia kine ki centre na ka bynta ki riew tynmen bad kumno ngin lah ban iatreilang bad ki Institution kum ka Nabon Memorial Home na ka bynta ka jingmyntoi jong ki riew tynmen jong ngi bad ki nongshongshnong bala rangbah jongngi” ong u Conrad hadien ba dep plie ia ka Nabon Memorial Home, ka matti jong ka Jingiaseng Kynthei Shillong Ri-Lum Presbytery, ha Mawiong Rim, Shillong.
U Conrad u ong ba kane ka Iing na ka bynta ki riew tynmen kaba la ai kyrteng ha ka Kynthei ba nyngkong eh ban long Khristan na ka Jaidbynriew Khasi, ka dei kaba don jingmut bha.
“Ka pyni ym tang ka jingpdiang ia ka niam Khristan hynrei ban im ka jingim khristan manla ka sngi kaba pynpaw ia ka jingkordor ka jingshakri bad ka jingkyrshan ia kiba donkam bad kane ka bynta ba donkam jong ka niam Khristan ka phalang ha ka kyrteng bad ka Iing ba ngi plie mynta” ula ong.
U Myntri Rangbah ula batai shuh shuh ba ki Anganwadi Centre kin don ia ka bynta ba kongsan ha ka jingpyntreikam ia kine ki centre.
“Ki Anganwadi Centre ki long kiba kongsan na ka bynta ka jingheh jingsan jong ki Khunlung bad ka dei ka bynta ba hakhmat eh ha ka Mission 1000 sngi, kine ki anganwadi centre kin long ki nongpynbeit na ka bynta ki kam ba iadei bad ki khunlung khynnah bad kiba la riew tynmen” ula ong.
Haba pynkut ia ka jingkren, u Myntri Rangbah ula pynpaw ba ki jaidbynriew riewlum bad ka imlang sahlang ki dei kiba ri ba suar ia la ki tynmen ki kro bad bynrap “Hynrei namar ka jingkylla ka juk, ka jingnang long nongsor bad kiwei ki daw ngi lah iaid lait na kane ka kam ba ngi ju leh bad kum ka Jaidbynriew, ka imlang sahlang ka balang bad ka Sorkar ngi hap ban leh eiei halor kane ka kam”.
Ka Nabon Memorial Home ka thmu ban kyrshan ia ki kynthei kiba la iaplok, kiba shah iehnoh bein lane kiba la duh jingkyrmen- kiba im ha ki jingeh khlem ki iingsah kiba biang lane ka jingkyrshan ba kynja mynsiem bad ia kane ka project la lamkhmat da ka Jingiaseng Kynthei Shillong Ri-Lum Presbytery.
U Myntri Rangbah ula pynbna ia ka jingiarap song pisa ba T.25 lak na ka Chief Minister’s Special Development Fund sha ka Nabon Memorial Home.
