Shillong, Jylliew 16 : Ka Sorkar Meghalaya kala shimkhia ban tehlakam noh ia ka jingaiwai beain ia ki kali shimet ban kamai pisa, kynthup ki kali arshaka bad saw shaka, kiba dei jong ki riewshimet ne ki Agency kiba khlem da iohbor kat kum ki ain ka Sorkar Jylla ne Sorkar Pdeng.
Lah ban pynkynmaw ba u Raja bad ka Sonam Raghuvanshi, ki shijur kiba don bynta ha ka jingjia ha Sohra, kila shim wai ia ka scooty na Keating Road, Shillong ka bym pat shym la register satia ha kino kino ki bor ka Sorkar Jylla.
Ka Ophis u Commissioner of Transport ha ka 13 tarik Jymmang, 2025, kala pynmih ia ka jingpynbna paidbah, ba pynshai ba ka Meghalaya kam pat pynbna lane pyntreikam satia ia ka skhim aiwai ia ki kali arshaka ne aiwai ia ki kali saw shaka (Rent-a-Motorcycle or Rent-a-Cab Scheme).
Kane ka mut ba ki riew shimet ne kynhun shimet kiba lah ban aaiwai ia ki kali jong ki ban pyndonkam da ki nongwan shangkai lane ba kin leit kamai.
Kane ka jingpynbna kala long ka mat iatai hadien ka jingjia ia u Raja Raghuvanshi, uba shah pyniap hala ka kurim bad ka kynhun ki runar ha Sohra, kiba la shimwai ia ka scooty na Shillong, ka bym pat shym la register ha kano kano ka skhim ban aiwai.
Ia kane ka jingkhang aiwai la pyntreikam hapoh ka kyndon jong ka Motor Vehicle Act, 1988 khamtam ka kyndon 66 kaba kren shai ba dei ban don ia ka Permit ban pyniaid ia ki kali kamai.
Kumjuh ruh ka kyndon 192A ka kren shai ba dei ban dain kuna ia ka jingpyndonkam ia ki kali shimet ba kin pyniaid kamai bad ka kyndon 207, ka aibor ia ki bor Sorkar ba kin kurup ia kine ki kali.
U Commissioner ka Transport ula maham ba ki nongpynkhein ain kin ngat ha ki jingpynsajia kiba tasam bha kynthup ka jingdain kuna, ka jingkurup ia ka kali bad ka jingset along.
U Superintendent of Police (Traffic) ka East Khasi Hills, K Prasad ula pynthikna ba ka jingpyntreikam ia kane ka jingpynbna kala sdang mynta.
“Ngi la ioh pdiang ia ki jingbthah bad ngi la bthah ia baroh ki Pulit pyniaid kali kiba don sha baroh ba kin shimhia. Lada shem ba kino kino ki shim wai lane tyrwa aiwai ia ki kali shimet khlem ki permit kin ngat ha ka jingpynsajia ba tyngeh katkum ka MV Act” ula ong.
Haba kylli la kane ka hukum ka treikam tang ha East Khasi Hills ne kumno, ula pynshai “Ka jingbthah ka la treikam ha baroh kawei ka Jylla naba kala wan beit beit na u Commissioner ka Transport. Ngi pyntreikam ia ka hangne hynrei baroh ki District ruh la khmih lynti ba kin pyntrei ia kam”.
Ka jingtalasi ia ki kali kala iaid shaid shaid ha kylleng ki jaka ha Shillong kynthup ha Mawlai, MES Junction bad ki jaka jngohkai bapher bapher. “Ngi la talasi ia baroh ki kali kynthup ki kali na Jylla bad kiba wan na shabar. Kiba pynkhein ain kin shah pynngat ha ka kyndon 182E bad 207” bynrap u Prasad.
Ka hukum ka treikam ruh ia ki Rapido ki bym pat register :
“Lada ki Rapido ruh ki bym pat register hapoh ka Tnad Transport, ki ruh kin ngat lang ha kane ka jingshah bat”.
