Shillong, Nailar 25: U National President ka National Peoples Party (NPP) bad Myntri Rangbah ka Jylla Conrad Kongkal Sangma, hynne ka sngi palei ula pynbna ia u Bah Rocky Hek kum u kyrtong ka Party na Pynthorumkhrah Constituency, ban aireng ha ka elekshon MLA-2023 ha Jylla.
U Bah Rocky ula mih noh na ka BJP bad pyniasoh sha ka NPP mynta ka sngi ban mih aireng pyrshah iala u Kni Bah Alexander Laloo Hek, ubym pat shah rem satia kum u MLA la san samoi na kane ka Constituency.
We heartily welcome Shri Rocky Hek to the NPP family and also affirm him as NPP’s candidate for 14- Pynthorumkhrah constituency for the upcoming Meghalaya Legislative elections in 2023. pic.twitter.com/AtubPRGeDD
— Conrad Sangma (@SangmaConrad) August 25, 2022
Ia u Bah Rocky la pdiang da u Conrad ha ka jingiadon lang u National Vice President bad Symbud Myntri Rangbah ka Jylla Bah Prestone Tynsong, u President ka NPP-Meghalaya bad MP Rajya Sabha Dr WR Kharlukhi bad kiwei kiwei ki nongialam jong ka party.
U Bah Rocky ula ong ba ula mih ban aireng ha kane ka elekshon ban wan ym pyrshah iala u jong u Kni hynrei na ka bynta ka roi ka par jong ka Constituency.
“Nga la mih aireng na ka bynta ki Longkmie kiba la iakhun manla ka sngi na ka bynta ka iing ka sem, nga la mih iakhun pyrshah ia u droks uba la ktah ia ki samla. Ngim kular satia ban ai kam sorkar hynrei ngi kular ba ngin da wad ia ki lad ki lynti ban pynkupbor ia ki samla lyngba ki jingsengkam lajong bad kiwei kiwei, kiba lah ban pynioh jakpoh” ula ong.
Haba pynpaw ba ym dei ban pyniakhleh ia ka kam iing kam sem bad ka kam sain hima sima, u Bah Rocky ula ong “Ka Iing ka sem ka dei ka iing ka sem bad ka kam sain pyrthei hi ka dei ka kam sain pyrthei. Ia kine dei ban pyniaphiah. Kane ka dei ka rai jong nga shimet ban iakhun ia ka elekshon bad ka thong hi ka long na ka bynta ka roi ka par jong ka Constituency”.
Haba kylli, u Bah Rocky ula ong ba palat 12000 ngut ki briew kila wan iashimbynta ha ka jingialang da ka jingsngew ieid bad burom ia ka jingnoh synniang jong u sha ka Constituency mynta la 25 snem.
“Ki paidbah ba wan mynta ka sngi ki dei ki nongai mynsiem ba ngan jop ha ka elekshon ban wan” ula ong.
U Bah Rocky u ong ba watla um pat long satia u MLA hynrei u Myntri Rangbah ka Jylla ula kular ban pynurlong ia kiba bun ki jingangnud jong ki paidbah ka Constituency.
U pyntip ba yn sa ai kawei ka Ambulance sha ka Shnong Shyiap, ban weng ia ka jingkyrduh um bala mad da ka shnong Mawpat naduh u snem 2009 nalor ban mang pisa ia ki madan ialehkai, ki streetlight bad kiwei kiwei.
U Bah Rocky u pyntip ba u Symbud Myntri Rangbah ula kular ruh ban sa khmih ia ka dorkhas bala aiti da ka shnong Langkyrding.
