Kular ban iarap ia ka Meghalaya ban seng la ka jong ka Medical College
Shillong, Nailar 24 : Ka Myntri khynnah ka Tnad ka koit ka khiah ka Sorkar Pdeng Dr Bharati Pravin Pawar ha ka sngi Palei kala pynbna ia ka rai jong ka Sorkar Pdeng ban kyntiew sa 50 seat ban pule MBBS ha North Eastern Indira Gandhi Regional Institute of Health and Medical Sciences (NEIGRIHMS).
Kala kular ruh ba ka Sorkar Pdeng kan ai ia baroh ki jingkyrshan ba donkam ia ka Meghalaya ba kan seng noh iala ka jong ka Medical College.
Hadien ka jingwan jngoh bad shong jingialang bishar kam ia ki kam bapher bapher jong ka NEIGRIHMS, ka Dr Bharati kala ong “Ngin sa nang pynbun sa 50 seat ban pule MBBS ha u snem ban wan bad kan sa long noh 100 seat ha NEIGRIHMS”.
Kala pyntip ba ka Sorkar Pdeng kala ai ia ka NEIGRIHMS ia ka mang tyngka ba kot T. 600 klur haduh mynta ba kan pynheh iaka Medical College bad Nursing College.
Kat kum ka jingong jong ka, ka Sorkar Pdeng ha kine ki 9-10 snem kala pynleit jingmut bha ban kyntiew ia ka NEIGRIHMS bad kala ai iaka mang tyngka ban pynkhlain ia ka jingshakri jong kane ka jaka sumar.
“Ha u snem bala lah, ka mang tyngka ka long T. 480 klur bad mynta u snem, ka mang tyngka ka long T. 528 klur. Kane ka pyni ba ngi dang iai kyntiew man u snem ia ka mang tyngka” kala bynrap.
Ka Myntri Khynnah kala ai ka jingiaroh ruh ia ka jinglah jingshakri jong ka NEIGRIHMS ba kynthup ia ka jingai jingsumar ha ka Radio Therapy.
Haba kylli la ka Sorkar Pdeng kan kyrshan ia ka Meghalaya ba kan don noh la ka jong ka Medical College, ka Myntri Khynnah kala ong “Ka Sorkar khlem pep kan kyrshan ia ki medical college bad ngi la nang pynkhlain ruh ia ka NEIGRIHMS. Ngin ai ka jingkyrshan ia ka Jylla ba kan ioh sa kawei ka medical college”.
Haba bishar ruh ia ka jingiatreikam ka National Health Mission (NHM) ha Meghalaya, ka Dr Bharati kala pyntip ba ka Sorkar Pdeng kala bei pisa haduh T. 600 kur tang ha une u snem na ka jingbei pisa ba 90:10.
“Nalor ki song iarap Covid (ECRP-1) bad ECRP-2, ka Sorkar Pdeng kala ai ruh ia ka mang pisa ba kot T. 25 klur sha ka Meghalaya na ka bynta ka ECRP-1 bad T. 117 klur ia ka ECRP-2” kala ong.
Ban pynkhlain ia ki sub centre bad ki health and wellness centre, ka Myntri ka iathuh ba ka Sorkar Pdeng kala dep ao oa la song pisa ba T. 150 klur ia ka Meghalaya hapoh ka 15th Finance budget.
Pule lang ia kane: Kem ki Pulit ia u Nongniah scooty ba tynrah ia u Khynnah Skul
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
