Pynbna ka MIDC ban pynsangeh noh ka thied jaka ha Umsiang-Mawkdoh ban pynkylla Industrial Estate

Shillong, Iaiong 16 : Ka Meghalaya Industrial Development Corporation Ltd (MIDC) ha ka sngi Balang kala pynbna ia ka rai ban pynsangeh noh bad pyndapnoh ia ka jingtyrwa ban thied jaka ha Umsiang-Mawkdoh, Ri-Bhoi District namar ki jingpyrshah kiba mih dang shen halor kane ka jingthmu.

Ka kyrwoh bala pynmih da ka MIDC ka pynshai ba ka jingthmu ha lyndet ka jingithuh ia ka jaka ha Umsiang-Mawkdoh ka long eh namar ka jingbiang jong ka jaka ba ka don bad ka jingbiang ban pynlong kum ka Industrial Estate.

Kane ka jaka kaba mapkhap bad ka Electronic City ban dang mih jong ka Assam, la iohi kum ka lad ban pyn long kum ka Industrial Hub ka juk mynta ka ban long kyrpang tang ia ki karkhana ki bym pynjaboh ia ka mariang-ki karkhana kibym pynjot pynjulor ia ka sawdong sawkun ne pynmih jakhlia.

Ka jingthmu ka long ban pyndonkam ia kane ka jaka ba kan pynkha ia ki lad aikam iajam ia ki trai shnong bad noh syniang ruh sha ka jingkiew ka ioh ka kot ka Jylla lyngba ki kam jong ki karkhana bad ka jingpynmih pisa ruh kumjuh, kala bynrap.

Ka MIDC kala pyllait ia ka Expression of Interest (EOI) ha ka 7 tarik Lber 2025 na ka bynta kane ka kam bad ia kane ka jing pynbna la pynmih ha ki lad pathai khubor ka Jylla. Hadien kane, hynriew ngut ki briew ba kwah die jaka kila iashimbynta ha ka kam.

Hynrei, ka Corporation kala ioh pdiang ia bun tylli ki jingpan jingtip RTI na ki seng bapher bapher naduh ba ka pynmih ia kane ka jingpynbna.

“Katto katne na kine ki jingpyntip kila pynpaw ia ki jingkam kiba bakla bad ba ialam bakla ba ka jingiadie iathied jaka kala dep, hynrei ka bym dei kaba shisha. La don ruh kila pynphriang ba ka Corporation kala dep pynlut T.100 klur ha ka jing thied jaka, kane ruh ka bym dei satia. Ka mang tyngka bala mynjur ia kane ka sienjam ka long tang hapoh 5% ka pisa bala iakam” ong ka kyrwoh.

Nalor kane ka MIDC kala ioh pdiang ruh ia shibun ki shithi na ki kynhun bapher bapher kiba pynpaw ia ka jingpyrshang ban pynkha ia ka Industrial Estate ha ka thain. Namar kata ka ong “Kumta, ka Corporation ka sngew ba kan bha shibun ban pynsangeh noh ia kane ka jingthied jaka lada kam lah ban pyndonkam ia ka jaka kum ka Industrial Estate”.