Shillong, Nailar 09 : Ka Meghalaya Film Makers Association (MeFILMA) ha ryngkat ka jingiatreilang bad ka Tnad Tourism ka Jylla, kan sa pynlong ia ka Meghalaya International Film Festival naduh ka 12 tarik haduh ka 16 tarik u bnai Nohprah 2022.
Haba pynbna ia kane, u President ka MeFILMA Bah Commander Shangpliang ula ong ba ka thong jong kane ka tamasa ka dei ban ai ka rynsan ia ki nongshna phlim khamtam ki nongshna phlim jong ka thain ba kin pyni ia ki phlim jong ki bad ruh ban pyni ia ka sap bad ka jingtbit shna phlim.
Une u Nongialam ka MeFILMA ula kyntu ia ki paidbah ka Jylla ba kin wan shakhmat bad kyrshan ia ka karkhana shna phlim hapoh ka Jylla ka ban kynthup ia ki College kiba kwah ban don bynta ha ki kam shna phlim bad iashimbynta ha ki International Film Festival.
U Bah Commander ula pyntip ba ka MeFILMA kan pynlong ruh ia ka jingiakop shna logo bad signature video ba 40-50 second hapdeng ki samla ka Jylla na ka bynta kane ka tamasa.
Ka sngi ba khatduh ban aiti ia kine ki logo kan long ha lane shuwa ka 16 tarik Nailar 2022 katba ia ka signature video, ka sngi ba khatduh kan long ha lane shuwa ka 31 tarik Nailar 2022.
Ki Nongjop ha kine ki artylli ki jingiakop kin ioh ia ka khusnam da ka song pisa ba T. 10000 ia u logo bad T. 20000 ia ka signature video.
Ka matpdeng jong u Logo bad Signature Video kan long : The Meghalayan Age, Tourism, bad Art and Culture.
