Dibrugarh, Nailar 09 :Hashwa ka jingrakhe ia ka sngi laitluid jong ka Ri (Independence Day), ki suba lehnoh ki ba dei na ka kynhun NSCN (K) bad ULFA (I) ki la hiar thma ia ka ktem jong ki shipai Assam Rifles ha Pangsau Pass hajan khappud ka India- Myanmar, kaba hap hapoh Changlang district ka Arunachal Pradesh hynne ka step sngi ba Ar.
Halor kane ka jingjia ym pat shym la ioh jingtip halor ka jingduh ki mynsiem briew, hynrei katto katne ki khubor ki iathuh ba uwei u shipai Assam Rifles u la iap ha kane ka jingshah thombor.
Ki tyllong khubor ki iathuh ba ki dkhot jong ka kynhun NSCN (K) bad ka ULFA (I) ki ba rah ha ryngkat ki tiar siat ba khlainbor, ki la hiar ia katei ka ktem jong ki shipai Assam Rifles ka ba dang shu dep tei thymmai. Kane ka jingjia kala jia ha ka por kumba 4 baje hynne ka sngi ba Ar.
Na ka liang ki shipai Assam Rifles ki la pynphai markylliang sha ki lehnoh bad ka la mih ka jingiather kuli ka ba jur hapdeng kine ki ar kynhun, hynrei ym pat shym la ioh ia ka jingtip ka ba bniah halor ka jingduh jong ki mynsiem briew, ong ka tyllong khubor.
Ha ba pynthikna halor kane ka jingjia, na ka liang u Superintendent of Police (SP) ka Changlang, u Mihin Gambo u la ong ba ki la ioh jingtip ba ka la don ka jingiather kuli ha ki bynta jong ka Pangsau Pass hynne ka step.
Ha kawei pat ka bynta, na ka liang ki bor shipai ki la pynlong ka jingkhynra ka ba jur ha ki bynta khappud ka India- Myanmar hapoh Changland district.
Dang shen ki shipai ka Assam Rifles ki la pynlong ka jingkhynra ka ba jur pyrshah ia ki kynhun seng lehnoh ha Tirap, Longding bad ha ka thain Changlang ka Arunachal Pradesh ha ka ba ki la ioh ruh ban kem ia bun ngut ki dkhot ka NSCN.
Ka Pangsau Pass ka dei ka thain ka ba pajih tam hapoh Arunachal Pradesh bad ka ba don ruh ha khappud bad ka Myanmar.
Ki ba bun na ki kynhun seng lehnoh jong ka thain shatei lammihngi (Northeast) ki ju shna ia ki ktem jong ki ha ki jaka khlaw jong ka Myanmar bad wan rung sha ki bynta ka Arunachal Pradesh lyngba ki lynti khlaw.
