Shillong, Naiwieng 30: Ha ka sien ba nyngkong ka Meghalaya Athletics Association (MAA) bad ka Meghalaya State Olympic Association (MSOA) ha ka jingiatreilang bad ka tnat Directorate of Sport and Youth Affairs ka sorkar Meghalaya kan pynlong ia ka ‘Sohra International Half Marathon 2022’.
Haba kren sha ki lad pathai khubor u working president ka MSOA u bah John F Kharshiing u la iathuh ba ia kane ka jingiakob mareh la ioh ka jingithuh da ka Athletic Federation of India (AFI) bad kane ka iakop mareh kan long ha ka 21 tarik u bnai Nohprah 2022.
U bah John u la iathuh ba kane ka jingiakob mareh ka ‘Sohra International Half Marathon 2022’ kan sdang naduh Mawkdok shaduh Sohra Rim bad ka jingjngai ka rukom mareh ka long kumba 20 kilometer.
“Ka long kaba sngewkmen ban pynbna ba ka ‘Sohra International Half Marathon 2022’ kan long ha 21 tarik u Nohprah bad ia kane ka jingiaob mareh yn pynlong ruh katkum ki kyndon ka AFI kumba ju pynleh ha kiwei ki jylla bad kiwei ki ri ka pyrthei” la ong u bah John.
U bah John u la ong ia kane ka jingiakob mareh la phiah ha ki 4 bynta kata ka Elite Group (International Athletes), naka bynta ki nong Meghalay, naka bynta kito kiba 50 snem shaneng bad ka ‘Run for Fun’ ha kaba ki nongshim bynta kin hap ban siew T.500 bad T. 200.
U la ong ba kino kino kiba ban shim bynta ki lah ban pyndap iaka Phorm ‘Online’ daka ba leit shaka website meghalayaolympicassociation.com bad ki lah ruh ban pyndap Phorm hapoh ka ophis treikam jong ka MSOA.
Shuh shuh u la iathuh ba ki nongjop kin ioh khusnma da ka song pisa bad kan don haduh 5 tylli ki Consolation Prizes.
