Shillong, Jymmang 02: U trai jong ka Ialam Makri Gas Agency, bah Ialam Makri hynne ka sngi ula pyntip ba ki paidbah kiba shim tyndong lyer shet na kane ka kompeni kin sa ioh biang iaka pisa ba kila thep namar ia kane ka kompeni la hap ban khang shwa namar ka jingbym lah ban pynbiang iaki kot jingdonkam.
Haba kren sha ki lad pathai khubor u bah Ialam ula iathuh ba la seng iaka Ialam Makri Gas Agency naduh 2022 haka jingiatreilang bad ka Seujee LPG Distributor Agency napoh ka jylla Assam hynrei haduh mynta kane ka kompeni kam shym la ioh ka jingbit ban sam tyndong lyer shet na ka IOC.
U bah Makri ula iathuh ba haduh mynta ki don kumba 600 ngut ki paidbah kiba la pynrung kyrteng bad ka Ialam Makri Gas Agency bad kum u trai jong kane ka kompeni ula shim jingkitkhlieh ban pynphai biang iaka pisa jong ki paidbah naduh ka 20 tarik mynta u bnai.
Ula iathuh ba ka Ialam Makri Gas Agency kala shim pisa T.4500 naka bynta kawei ka tyndong lyer shet bad T.6500 naka bynta 2 tylli ki tyndong lyer shet bad baroh kiba la pynrung kyrteng ha kane ka kompeni kin ioh biang iaka pisa kumba kila siew haka por Applai ban ioh Gas.
“Namar ba ngam shym la lah ban pynbiang iaki kot ki sla ba donkam bad namar ba ka kompeni Seujee LPG Distributor Agency na Assam ka dang don Case ha Madanryting Police station, nga la rai ban pynduh noh shwa iaka jingsam tyndong lyer shet bad ngan pynphai lut iaka pisa sha kito ki paidbah kiba la pynrung kyrteng haka Ialam Makri Gas Agency” la ong u bah Ialam.
