Shillong, K’Lyngkot 11: Ka seng Hills State People’s Democratic Party (HSPDP) hynne ka sngi Balang, kala pynbna iaka thup kyrteng jong ki 7 ngut ki kyrtong ki ban iakhun ha kane ka ilekshon ban wan.
Haba pynbna ia kine ki kyrtong u Chairman ka Election Committee ka HSPDP bah H Witting Masor, ula iathuh ba hane ka thup ba nyngkong ki don 7 ngut ki kyrtong ki ban iakhun ha kane ka Elekshon ban wan.
U bah Witting ula pyntip ba ki kyrtong ki kynthup na Mawhati konstitwensi ka kong Evalyne Kharbani, na Umsning u bah Primson Makdoh, na Mawthadrashan bah Shakliar Warjri, na Nongstoin bah Sanjied Kynsai Shangrit, na Rambrai bah K. P Pangngiang u badei ruh u president ka HSPDP, na Mawshynrut u bah Methedeius Dkhar bad na Mawkyrwat konstitwensi bah Milansing Lyngdoh.
U Witting ula pyntip ruh ba shen ka party kan sa pyllait iaka thup ba ar lane ka second list bad naka liang ka HSPDP ka don ka thong ban pynieng kumba 10 haduh 12 ngut ki kyrtong ha kane ka elekshon ban wan.
“Ha ka thup ba ar ba ka HSPDP kan sa pyllait kin don kumba 5-6 ngut ki kyrtong na ka thain East Khasi Hills bad na Jaintia Hills” la ong u bah Witting.
