Shillong, K’Lyngkot 11: Ka seng Federation of Khasi Jaiñtia and Garo People (FKJGP) hynne ka sngi Balang, ka la leit rung sha kamra treikam u Director ka tnat Directorate of Printing and Stationery bad dawa ia u ban mih na kane ka ophis halor ka jingkynnoh ba u pyndonkam bakla ïa ka pisa kaba la kot haduh T. 2 klur tam.
U Nongialam ka FKJGP u bah Reginald Thabah ula ong ba kane ka jingwan rung kynsan ki dkhot ka seng kadei ruh hadien ba ka seng kala phah shithi ba dawa na u Myntri Rangbah ka jylla ban wengkam noh ia une u Director u Salgira R Marak hapoh 10 sngi.
U bah Reginald ula ong ba kane ka jingdawa wengkam ia une u Director kadei ruh hadien ka jinglap jong u bah Egenstar Kurkalang lyngba ka RTI ba la pyndonkam bakla haduh T. 2 klur.
“Ka seng kala ai por 10 sngi iaka sorkar ban wengkam ia une u Director hynrei namar ka jingbym sngap ka sorkar, ka seng ka la shim ia kane ka sienjam ban wan beh ia une u Director na kane ka kamra treikam” la ong u bah Reginald.
U bah Reginald ula ong ba ka sorkar kadei ban sngap iaka jingdawa namar une u Director ula pyndonkam bakla haduh T. 2 klur katkum ka kaiphod RTI.
Na ka liang u Director ka tnat Directorate of Printing and Stationery u la kam ba kadei tang ka jingkynnoh kaba ïalam bakla bad kaba kwah ban pynthoh bria ia u.
U Salgira R Marak u la ong ba ha ka jingtrei ïa ka kam, ym lah ban kiar na ki jingpynlut pynsep bad ka Enquiry Committee ka dei ban shong tohkit ia kane ka kam mynta ka sngi hynrei na ka daw ka jingbym lah kiar kumta la hap ban pynkynriah noh sha kawei pat ka sngi.
