Pynbna ka HNLC ban ym wanphai shuh sha ka jingiakren iasuk bad ka Sorkar

Shillong, Nailar 14 : Ka Hynniewtrep National Liberation Council (HNLC) kaba la shah khein beain, ka la ong ba kan nym wan phai shuh sha ka jingiakren ia suk lymda ka sorkar ka wanrah ia ka lad iapynbeit kaba don tynrai ha ka histori ba shisha bad ki jingangnud jong ka jaidbynriew Hynñiewtrep.

“Ngi pynkynmaw ia ka sorkar ba lada ka dang pyneh triang, kabym don mon ban ithuh ia ki jingshisha kat kum ka histori bad ki jingangnud sain pyrthei jong ka jaidbynriew Hynñiewtrep, ngin ym wanphai shuh sha ka jingiakren ia suk. Ka jingkut jingmut jong ngi ban iada ia ka jinglong trai bad ka burom jong ngi ka long kaba ym lah ban pynkhih,” ong u General Secretary ka HNLC Bah Sainkudpar Nongtraw ha ka kyrwoh ba pyllait ha ka sngi Palei.

Haba pyndon burom ia ki riewshlur ba kyllon iap, ha ka jingrakhe ia ka sngi kyntiew lama jong ka seng, ka HNLC ka pynpaw ia ka jingsngewnguh ia ki bahaiing hasem jong ki dkhot ba ehrang ka seng kiba la len lade na ka bynta ka jingialeh.

“Ha kane ka sngi, ka HNLC ka kynmaw burom ia ki riewshlur ba kyllon iap jong ka kynhun shipai Hynniewtrep, kiba la aiti ia la ka jong ka jingim na ka bynta ka jaitbynriew jong ngi. Ngi pynpaw ia ka jingsngewnguh kaba khraw ia kiba ha iing ha sem jong ki riewshlur jong ngi, kiba ka jingaiti jong ki ka ai mynsiem ia ngi ban pynbteng,” ong u Bah Sainkupar haba bynrap “Ngi pynpaw ruh ia ka jingsngewnguh naduh ka mynsiem ia baroh ki nongkyrshan jong ka HNLC, kynthup ia ki riew paidbah bad ki kynhun sengbhalang ka bri u Hynniewtreo, kaba ka jingiatylli jong ki ka pynkhlain ia ka jingiakhih jong ngi”.

Ka HNLC ka la rai ban bteng ia ka jingiakhun ban ioh ia ka synshar khadar da ka jingkut jingmut kaba skhem, haba ban jur ba ka jingiakhun jong ka, kam dei tang ka jingialeh hynrei ka dei ka lynnong kaba don jingmut ha ka histori jong ka jaidbynriew Hynñiewtrep.