Pynbna ka HANM ban leit iakhih ha Jantar Mantar halor ka ILP bad ktien Khasi/Garo

Shillong, Risaw 12: Ka Hynniewtrep National Achik Movement (HANM) hynne ka sngi kala pynbna ba kan leit iakhih sha nongbah Delhi haka 3 Naiwieng 2023 ha Jantar Mantar.

Haba pynbna ia kane u President ka HANM bah Lamphrang Kharbani ula iathuh ba ka sorkar Delhi kala ai jingbit ia ka Seng ka kan pynlong ia kane ka jingiakhih haka 3 Naiwieng 2023 ha Jantar Mantar.

U bah Lamphrang ula ong ba kane ka jingiakhih ha Delhi kadei naka bynta ban pynsngew iaka sorkar pdeng haba iadei bad ka jingdawa pyntreikam iaka Inner Line Permi (ILP) ha Meghalaya, ban pynbeit noh iaka jingiapynbeit pud hapdeng ka Meghalaya-Assam bad ban ithuh noh iaka ktien Khasi bad Garo hapoh ka khyrnit ba phra jong ka riti synshar ka ri India.

Ula iathuh ba dang shen ka seng kala leit sha nongbah Delhi, ka HANM kala kynduh ia u MP u Rakesh Sinha bad haka jingiakynduh kala kyntu ia une u MP ban iakren bad u myntri rangbahduh ka Ri India u Narendra Modi ban pynsngew iaki mat jingdawa ki nong shong shnong ka Meghalaya.

“Haka jingshisha ngi la pan 2 sngi ban pynlong iaka jingiakhih hynrei namar ba bun palat ki kynhun kiba wan na kylleng ka Ri ban iakhih ha Jantar Mantar, ka sorkar Delhi kala ai tang shisngi kata haka 3 tarik mynta u bnai” la ong u bah Lamphrang.

Nalor kane u bah Lamphrang ula iathuh ba haka por ba don ha Delhi, ka seng kaka aiti ruh iaka dorkhas shaka ophis treikam ka president ka ri India, sha ka ophis treikam u myntri rangbahduh ka Ri bad sha ki myntri sorkar pdeng ban pynsngew iaki mat jingdawa jong ka jylla baroh kawei.

Ula iathuh baka seng kan ialam palat 150 ngut ki dkhot ka HANM sha Delhi ban pynlong ka jingiakhih ha Jantar Mantar kum shi bynta ban pynioh sngew shaki skhor ka sorkar pdeng.

“Khlem da jer iano iano, ka HANM ka iawer ia baroh kiba don ha Delhi ban wan kyrshan iaka seng haka 3 tarik Naiwieng ha Jantar Mantar bad ban shim bynta haka jingiakhih khnang baka sorkar pdeng kan ioh sngew iaka jingdawa ka jylla baroh kawei” ula ong.